Wekîlanê HDPyî Alîcan Onlu û Kemal Bulbulî pîya bi Rêxistina HDPyî ya Dêrsimî çarçewa Kampanyaya 'Semedê Her Kesî Edalet' de esnafî zîyaret kerdî û problemê înan goştarî kerdî. Wekîlan vat: Esnafî nêeşkenê rotiş bikerê.
Wekîlê HDPyî yê Dêrsimî Alîcan Onlu, Wekîlê Antalya Kemal Bulbul, Hemserekê HDPyî yê Bajarî Nurşate Yeşîl û Îbrahîm Kasun û Hemşaredarê Pêrî Orhan Çelebîyo ke herinda ci de qeyûm ame tayînkerdene ra heyetêk Dêrsim de esnafî zîyaret kerdî.
Alîcan Onluyî vat: ''Seba ke marketê pîlî, merkezê girewtiş û dayîşî ameyî akerdene, esnafê ke teberî ra dîyenr ardene înan rê paştdayîşê kredî yo bêhuqûq yeno dayene hêzê reqabetî yê esnafê cayîyî beno kêm. Tîya xeylêk cayê berardişî yenê qedexekerdene. Seba ke herêma mera yena qedexekerdene xora berê berardişî gerîyeno. Wexto ke berardişo cayî çînêbo esnaf zî bêhêz maneno.''
Kemal Bulbulî zî bale ante bêkarîya bajarî ser û vat: ''Esnaf dikanan de veng û vart ronişeno, nêeşkeno rotiş bikero. Esnafî rê qet hetkarîya madî nîna kerdene. Xora meseleyê taybetî yê Dêrsimî zî estê. Gama ke nê pêro resenê pê meseleya sosyo-psikolojîk vejîyena werte. Meseleya ekonomî zî eke bibo ser meseleyêka zaf girane vejîyena werte.''
