Polîsan serê sibayî eşt Şaredarîya Sûrî ya Amedî ser. Dormeyê Şaredarîye bi wesayîtanê zirxînan û polîsan ame girewtene û destûr nêame dayene ke kesêk şoro zereyê Şaredarîye. Bînaya şaredarîye de tehqîqat dewam keno û Hemşaredara Sûrî Fîlîze Buluttekîn û endamê Meclîsê Şaredarîye Yilmaz Eken ameyî destbendkerdene û ameyî berdene bi Mudirîyetê Asayîşî yê Amedî. Ame parekerdene ke dosyaya destbendeyan ser o bira nimitkîye esta.

Tosune û Endamê Meclîsî Ameyî Derbkerdene

Sereştişê Şaredarîye ra dima Wekîla HDPyî ya Amedî Remzîye Tosun, endamê Meclîsê Şaredarîye, xebatkarê şaredarîye û şar verê bînaya şaredarîye de ameyî pêser. Polîsan destûr nêda ke xebatkaranê şaredarîye ra ber kesêk dekewo zereyî. Seba ke Wekîle Remzîye Tosun, endamanê Meclîsê Şaredarîye waşt ke debikewê zereyî, polîsanê hêrişê înan kerd. Wekîle Remzîye Tosun vera nê hêrişî nêrazîbîyayîşê xo mojna û îfade kerd ke no xesp o û ê do ney qet qebul nêkê. Tosune vat: "Na bêhuqûqîye ya. Şima talanker û cerg ê." Grûbe verê bîna ra ameye dûrvistene. Bînaya Şaredarîye de cigêrayîş dewam keno.