Endama Komîteya Merkezî ya PKKyî Hêlîne Umît Medya Haber TV de şerê gerîlayan ê vera îşxalî ercna. Qiseykerdişê Hêlîne Umît ra tay noqtayê girîngî wina yê:

''Ez xoverdayîşê Îmraliyî yê Rayber Apoyî selam kena. Bêguman vera tecrîdê Îmraliyî têkoşînêko hîra yeno kerdene. Gerîlayî zî serkêşîya nê têkoşînî kenê. Gerîlayê Azadîye yê Kurdîstanî seba rijnayîşê sîstemê Îmraliyî têkoşîn kenê. Ciwanê kurdî seba Rayber Apoyî ganî tewirê hîna aktîf û radîkalî bigêrê. Sere de Vakurê Kurdîstanî de her ca de ciwanî wa nê erkî nêdê kişte. Ma Rayber Apoyî ganî biwanê; no girîng o. La ganî ma fikranê ci zî bîyarê ca û goreyê ney tewirêkî bigêrê.

Dewleta tirke 23yê tebaxe de Silêmanî de di rojnamegerî Gulîstane Tara û Hêro Bahadîn qetil kerdî. Ez nê wird cinîyan bi rêzî yad kena. Gulîstane û Hêro erkê xo ser de ameyî qetilkerdene. Bi îftîra û reşkerdişî çew nêeşkeno raştîyan binimno. Medyaya PDKyî seba ney zaf xîret kerd. Deqaya verêne de bi taybetî K24 çi warê serebûtî û vat ke ê kam ê. Seke ê endamê PKKyî yê serebût weşana. Vat ê çekdar ê, îdarekarê PKKyî yê. Ganî herinda Gulîstane û Hêro de 100 ciwanî debikewê erkî. Ez seba ney venga ciwanan dana.

Xoverdayîşê gerîlayan Vakurê Kurdîstanî ra  heta Zapî; Avaşînî ra heta Amedîyê, Xakurkê, Xinêre dewam keno. No xoverdayîş xoverdayîşêko tarîxî yo. Gerîlayê azadîye yê Kurdîstanî vera serwerîya tirkan, îşxal û hêrişanê qirkerdişî yê dewleta tirke şerê estbîyayîşê şarî kenê. Gerîlayî teyna vera îşxalî ney, seba dîyarkerdişê ameyoxê herême, ameyoxê dinya, ameyoxê şaran şer kenê. 

Ez qalê PDKyî û keyeyê Barzanîyan bikera. Nê her çî seba pereyî kenê. Her çîyê şarê ma kenê babeta bazarîye. Seba ney dewleta tirke de têkilîyan kenê. PDK kurd nîyo, kurdayetîye temsîl nêkeno. Eke roşnîyêka kurdan est a, a zî PKK ya. PDK tarîtî ya. 

Dewleta tirke Başûr de 159 baregehî awan kerdê, bi des hezaran leşkerê xo Başûr de cakerdê. La hukmatê Başûr û Iraqî vera ney fekê xo anêkenê. Ez vana qey rojanê verê ma de dewleta tirke hêrişanê xo giranêr bikera. Xora çend rojî verê wesayîtê keyeyêkê erebî dîyabi bombayan ver.

Iraqî partîya ma kerda lîsteya rêxistinanê qedexekerdeyan. Zerarê m Iraqî rê çin o. PDK vano ke PKK zerar dano kurdan coka nê hêrişî yenê kerdene. PKKyî ra nêbo çew nêeşkeno bi rehetî vajo ke kurd o. A raşte PDK partîya kurdan nîya. Ganî cade vera îxanetê PDKyî çalakîyê aktîfî bêrê kerdene. Wa tewirêko hewce PDKyî rê bêro mojnayene, weşanê ci nêrê seyrkerdene û vera PDKyî têkoşîn bêro kerdene. 

Têkoşînê şarî yê vera îşxalî zaf girîng o. Şarê ma perwerê Rayber Apoyî û gerîlayan o. Ma prosesêkê tarîxî ra derbaz kenê û ganî her kes goreyê ney têbigêro. Nêbeno ke têkoşîn bi temamî gerîlayan ra bipawîyo. Ganî şar bi tewirê radîkalî têkoşîn bikero. Ganî şerê şarî yo antîfaşîst bêro kerdene. Ganî ma bi nê hawayî Roja Haştîye ya 1ê Êlule bipawê.''