Ewro roja 10. ya xoverdayîşê Mamreşoyî ya, artêşa tirke rew ra bin kewte

1ê Gulana 2021î-Roja 8. ya Xoverdayîşî

Ewro ez, embaz Mervan û Adîl ma seba ke Mamreşo de serebûtan teqîb bikerê û bewnê kamerayan ra şinê Girê Qertalî yê Şehîd Şorişî. Cebilxaneyê milê embaz Adîlî tewr tay 40 kîlo yo. Rixmê vengê pêkewtişan zî Edîl nêvindert.

Wexto ke ma dûya sîya ya Mamreşoyî dîye û vengê pêkewtişan eşnawitî qerqilîyayî la ma Qertal de vengê embaz Serhatî eşnawit û oxx kerd. Embazan xoverdayîşê xo rê dewam kerdêne. 23ê nîsane  ra nata Mamreşo û Mervanos de pêkewtişî bêmabên dewam kenê.

Ewro roja 8. ya xoverdayîşê tunelanê Şehîd Serdar û Şehîd Munzurî. 8 rojî yo artêşa tirke nêeşkaye ser bikewa. Artêşa pîle ya tirkan vera çend gerîlayan bin kewte. No têna serkewtişêko taktîksel nê  serkewtişê bawerîya îdeolojîya Rayber Apoyî yo.

Mewzîyeanê Şehîd Serdar û Şehîd Munzurî de embazî pê hacetanê bêtelan ê pîlan têkilîye nanê ro. Wexto ke ma vengê embaz Serhat û embaze Rûkene eşnawenê ma vanê qey seke dişmen hetê ma de yo, ê înan de nê. Vengê înan hende bicoş o. Vengê embaz Serhatî moral dayêne. Ma pêro pabeyê vengê Serhat, Rûkene, Sarya, Canfedai Kamûran, Zafer û Xebatî bîyî.

Mewzîyê Şehîd Serdarî de 5 embazanê ma artêşa tirke rezîl kerdêne. Nê embazan bi rojan bê nan, hewn û awe vera dişmenî şer kerdêne. Ganî nê hîkayeyî bizanîyê. No vengdayîşê hêzî do Mamreşo û Mervanosî ra pêro Kurdîstan de vila bibo. No vengdayîş beno ke şerê çarenusê gerîlayanê Zagrosan o.

Çekê kîmyewîyî

2ê Gulana 2021î-Roja 9. ya Xoverdayîşî

Dişmenê ma artêşa tirke dişmenêko namerd û bêexlaq o. Dişmen Avaşîn de xo pêkewtişê germî ra dûrî gêno. Dişmen 9 rojî yo Mamreşo û Mervanos de pê bisivîng û bombaeştoxan dano mewzîyan ro, hetêkî ra zî şerê psîkolojîkî keno la reyna zî ser nêkeweno. Coka 5 rojî yo artêşa tirke vera wird mewzîyan gazê kîmyewîyî xebitnena û kena ke embazanê ma bixeniqna.

Vizêr embaz Serhat Giravîyî pê şîfre vat 'Dişmen zaf gazê kîmyewî xebitneno, zor dano ma.' Şehîd Serdar de embazî zî vanê dişmen pê gazî keno ke debikewo tunelan. 8 rojan ra pey reya verêne embazan vat 'Dişmen zor dano ma.' Kişta mi de embazêkî vat 'Embaze willay nê leşkerî ternok ê. Eke destê înan de kîmyewîyî çinbê ma zanenê se kenê înan rê.'

Destê dişmenî de çeka kîmyewîye ra ber çîyêk nêmendbî çunke înan se kerd zî nêeşkayî ser bikewê. Artêşa tirke sûcê şerî kerdêne û ma nêeşkayêne naye çewî ra îlan bikerê. Embazî 5 rojî yo vera teqayîşanê pîlan û gazê kîmyewîyî xo ver danê. Merdim senî eşkeno zereyê şikefteyî de verî vera gazî xo ver bido û dima vejîyo teber de şer bikero? Tîya Vietnam yan zî Helebçe nê Avaşîn o!

Berzîya xoverdayîşê Apogîrî

3ê Gulana 2021î-Roja 10. ya Xoverdayîşî

Ewro roja 10. ya xoverdayîşê Mamreşoyî ya. Şima qet eşkayî 10 rojan bê hewn, destê şima de çeke, rixmê teqayîşan xo ver bidê? Cewabê nê persan tewirê cuye yê embazan de yê. Xoverdayîşê Mamreşoyî bîyo o ca ke tede pêro zanayîşê cuye û şerî pûç bîyî, her çi newe ra manadar bi, ma tede pêro şiklê xoverdayîş û şerî newe ra ercnayî.

Nê xoverdayîşî de Pîrdogan Amed rema, dişmenî rê teslîm bi û kontra bi. 3ê gulane de se bi rîyê ey ra bi. Narey zî Pîrdogan bi rîyê îxanetî ke no rî tarîxê têkoşînê ma de tim estbi. Pîrdoganî embazê xo rotî, merdimîye xo vîra kerda, dişmen ard embazanê xo ser.

Fedayîyanê ê mewzîyan zî herinda cuya bêrûmetine de cuya azade weçînaye û seba ci şer kerd. Nika şerî sipî û sîya, rind û xirab, tersnok û çêr eşkera kerdêne. Dima nê vateyê emba Atakan Mahîrî ameyî mi vîrî:

'Mîyanê hende merdimanê çêran de,

Nê merdimê teberê merdimîye

Tarîx...Ax tarîx...

Beno ti vîjnenî, eşkera kenî ê holan.''

1ê gulane de Mamreşo de têkilîya ma û embazan birîyaye û ma hînî vengê înan nêeşnawit. Dişmen rewî ra Mamreşo de bin kewt. Rayberîya embaz Serhat Giravîyî de xoverdayîşê 10 rojan ser kewt. Embazî Serhat Giravî, Rûkene Zagros, Sarya Dîyar, Kamuran Amed, Zafer Tolhildan, Canfeda Hesekê û Xebat Aso şehîd 3ê gulana 2021î de netîceya gazê kîmyewîyî û îxanetê Pîrdoganî de şehîd bîyî

Nînan ra oyo tewr ciwan embaz Kamûran bi. O newe tewrê têgêrayîşî bi. Par wexto ke ma şîyî Dola Maran şikefte de teng bîyî. Embaz Kamuranî vatêne 'Embazênê tay sebr bikerê, ez peynîya nê şikefteyî de roşnî vînena.' Embaz Kamuranî pê na bawerîye şi şehadet. Embazan seba ke xo birensê a roşnîye xo ver da. xoverdayîşê înan serra înan ra û emrê înan ra pîl bi. Înan roşnîye dîye la ê bînî?

Embaz Serhatî tewirê xoverdayîşî mojna

4ê Gulana 2021î- Roja 11. ya Xoverdayîşî

Embaz Serhat Giravî (Kamuran Alpsar) fermandarîya xoverdayîşê 10 rojan a Mamreşoyî kerde. O serra 1989î de dadîya xo ra bi û ewladê eşîra Giravîyî bi. Serhat Giravî 2011 de tewrê gerîlayan bi û cade derbazê Zagrosan bi. Serhat Zagrosan de şerê vera dişmenî, xoverdayîş musa û bi fermandar. O zî sey Zagrosan xurt, xidar û xoverdayox bi. Embaz Serhatî 23ê nîsana 2021î de destpêkerdişê hêrişî de Mamreşo de wezîfe kerdêne. Embaz Serhatî reya verêne hacetê bêtelî ra wina vat: 'Mamreşo do dişmenî ra bibo goristan.' Na qerardarîya embaz Serhatî prosesê operasyonî û çarenusê hemle eşkera kerd.

Embaz Serhatî hetêkî ra şerê tunelan koordîne kerdêne hetêkê bînî ra zî moral dayêne embazan. Xoverdayîşê 10 rojan ê mewzîyê Şehîd Munzurî nîşaneya ruhê Apogîrî yê Serhat Giravî, Rûkene Zagros, Sarya Dîyar, Kamuran Amed, Zafer Tolhildan, Canfeda Hesekê û Xebat Asoyî bi.

Artêşa tirke pêro metod û teknîkî şuxilnayî la reyna zî nêeşkaye ser bikewa. Pêro prestîfê artêşa tirke herimîya û aye sûcê şerî kerd gazê kîmyewîyî xebitnayî. Embaz Serhat û embazanê bînan pê nê qîrayîşê raştîye xo resna şehadetî: 'Ma şerwanê Şehîd Serdarî yê, Zagrosan de îşxalkeran rê rayîr çin o!' Embaz Serhatî mojna ke ma senî biciwîyê û xo ver bidê.

Embaze Rûkene girê dayîya hêzê Basya bîye. Embaze Rûkene rêxistinkerdox, lîder, rîhuyaye bîye. Mi par payîz de embaze Sarya şinasnaye. Embaze Sarya çalakîya Govendê ra agêrabî ke tede embazî Rodî, Şoreş, Nalîne û Delîl şehîd bibî. A bimoral bîye la semedê şehadetan tay xemgîne bîye.

Nê wird cinîyê rindî Sarya û Rûkene Mamreşo de Girê Şehîd Munzurî de ameybî yewca.Wirdî zî bîyî çimeyê moralî yê xoverdayîşê Mamreşoyî. Embaze Rûkene wexto ke pê hacetê bêtelî vengê xo resnayêne ma ma tira moral û hêz girewtêne. Embaze Sarya mîyanê ê şerî de zî yarîyî kerdêne, moral dayêne ma.

Înan zanayêne ke beno do şehîd bibê la wa bibo! Înan pê tewirê cinîyan xo ver da, rayberîya nê xoverdayîşî kerde. Pêro cinîyê xoverdayoxî yê Zagrosan do înan xo vîr a nêkerê.