Hemşaredarê HDP’yî yê Qersî Ayhan Bîlgen û Şevîn Alaca şarî reyde ameyî têhet. Alaca ard ziwan ke ê do heme şarê Qersî tewrê xebatan bikerê û vat, “Endamê ma yê heyetê sindoqan, rayan ra wayîr vejîyayî. Ma sipasîya xo heme kesanê kerdkar û şarê Qersî rê kenê. No serkewtiş yê ma hemeyan o.”

Bîlgen: Cîyakerdiş çin o, xizmet esto  

Ayhan Bîlgenî zî vat, “Ma nêkewenê dima fanatîzmê partîyan û hesabanê qijan, berpirsîyarîya ma a ya ke ma waştişanê şarî bîyarê ca.  No şar xizmet paweno. Ma do nêkewenê mîyanê cîyakerdişêkê partîzan û ma partîyanê bînan ra zî eynî çîyî pawenê. Seba ke no serkewtiş dîyarîyê ma kerdo, ma şarê Qersî rê sipas kenê. Destpêkerişê kampanyaya weçînayîşî ra nata ma ard ziwan ke, rayberî bêrê kontrolkerdene û bieşkê hesab bidê. Ma ewro zî eynî çîyan vanê. Şarê Qersî no model tercîh kerd, ganî nika ra tepîya zî çi hewca keno do bikero.”