Dêrsim de qedexeyê çalakî û aktîvîteyan destpêkê prosesê janî ra nata dewam kenê. Dewleta tirke bi bahaneya Dêrsimî vengê şarî birnena û çalakîyanê demokratîkan û aktîvîteyan asteng kena. Dêrsim de 382 rojî yo qedexeyê 'demokrasî' esto.

Tewr peyên roja îneyî şayîya deyîran bi bahaneya janê Korona ameye astengkerdene. Şayîye semedo ke kargehî temburî qedîyabi do biameyêne kerdene û hunermendî Mîkaîl Aslan û Cemîl Qoçgirî do Meydanê Seyîd Rizayî de deyîrî bivatêne.

Hemsereka HDPyî ya Dêrsimî Nurşate Yeşîl vist vîrî ke qedexeyê gulana 2020î ra nata dewam kenê û vat: ''Janê Korona sey bahane yeno pêşkêşkerdene la ma qaşo kewtî prosesê normalîzebîyayîşî. Semedo ke vengê merdiman bibirîyo û merdimî nêvejîyê teberî nê qedexeyî yenê caardene.

Ma semedê çalakî û aktîvîteyanê xo cezaya pereyî girewte la ma qetî kuçeyî war nêverdî. Ma do kuçeyan de reyna waştişanê xo biqîrê. Ma do vera nê qedexeyanê walîtîye dewa akerde û hê pabeyê netîce yê. Ganî qedexeyî ma mevisnê bin. Ma do reyna kuçeyan de bibê û têkoşînê xo rê dewam bikerê.''