Vera xespkerdişê şaredarîyanê Bajaranê Pîlan ê Amed, Wan û Mêrdînî protestoşê şarî dewam kenê. Hemserekê Kongreya Cimatê Demokratîkî (KCD) Berdan Ozturkî derheqê xespkeridşê şaredarîyan û hêrişanê fîzîkî û sîyasîyan de ANF’yî rê qisey kerd.

Ozturkî qewimîyayîşê peyênî sey krîzêkê sîstemkî name kerd û va: ‘’ Îqtîdar bi xespkerdişê îdareyê şarî wazeno ke payra bimano. Nê bîyayîşî ramojnenê ke hem sîstem hem zî îqtîdarî îflas kerdo. Rayberê Şarê Kurdî Abdulah Ocalan vano, ‘ ez hewteyêk de na mesele çareserî kena’ la destê  hukmatî de çîyo ke bido  şaranê Kurdistan û Tirkîya çîn o. Aqilê dewleto ke Ocalan nîşan dano ma nika biraştî nêvînenê. Xora rewşa ke xirab a hîna xorî kenê. Tena zordarîye û faşîzmî ra xo weye kenê. Sere de mucadeleyê şarê Kurdî, mucadeleyê demokrasî û azadîye yê şaranê Tirkîya timûtim îqtîdarî ra hîna bihez o.

Şarê Kurd Anorê Xo Paweno

Bi na wesîle ez tîya ra veng kena şaranê Tirkîya kam ke azadîye, demokrasî û haştîyêka bianore wazeno ganî vejîyo meydanan. Vera faşîzmî ganî her kes tewirê xo ramojnê. Na tena meseleya HDP û Kurdan nêya. Meseleya heme şaranê ke azadîye û demokrasî wazenê ya. Coka ganî bêveng mero vindetene. Bêvengîye tesdîqkerdişê nê qewimîyayîşan o. Şaredarîyê HDP’yî bîlasebeb xesp kerdî. Destê înan de îspatê bêhuqûqî çîn o. Wa çew înan ra bawerî mekero. Îqtîdarê AKP-MHP’yî bi şîdet û xespî xo dano ciwîyayene. Coka ewro hêrişê Rojawanê Kurdistanî zî kenê. La şarê ma hem Rojawan hem zî Vakurê Kurdistanî de wayîrê îrade û anorê xo vejîyeno. Heta ke nê polîtîkayê faşîzm û xespî bêrê rayraberdene, çi heyf o ke şarê Tirkîya zî do tengayî biancê. Coka ganî ewro her kes vera xespkerdişê heqê şarê Amed, Wan û Mêrdînî vengê ox bikero yew û xoverdayîş bêro girdkerdene.’’