Silêmanî de vera Fetwaya Heyetê Berzî yê Fetwayan o ke pabesteyê Yewîya Alîmanê Îslamî ya Herêma Kurdîstanî yo çalakîyêk ameye kerdene. Çalakîkerî şîyî verê ofîsê Parlamentoyê Herêma Kurdîstanî yê Silêmanî la parlamenterêk zî tewrê çalakîye nêbi.
4ê kanûne de Heyetê Fetwayan fetwayêke weşanaye û vat ke ganî cinî têna megêrê û têna nêcinuşê taksîyan. Fetwa bîye semedê nêrazîbîyayîşan.
Na rewşe ser o ewro Silêmanî de 387 temsîlkarê rêxistinan, rojnamegerî Silêmanî de ameyî pêser û verbi Ofîsê Parlamentoyê Herêma Kurdîstanî yê Silêmanî rayîr ra şîyî û nêrazîbîyayîşê xo mojna.
Çalakîye de pankartê ''Ganî Heyetê Fetwayan fetwaya xo tepîya bianco'', ''Ganî ramitoxanê taksîyan ra efûyê xo biwazo'' ameyî kiriştene. Çalakîkeran verê Ofîsê Parlamentoyî yê Silêmanî de waştişê xo pêşkêş kerdî la parlamenterêk zî tewrê çalakîye nêbi.
Waştişê çalakîkeran wina yê:
1-Ganî fetwa pêser bêra antene
2- Heyetê Fetwayan efû biwazo
3-Ganî seba sucê vera cinîyan zemînêk nêro akerdene.
Dilsoz Zengeneya ke nameyê çalakîkeran eşkerayîye wende pare kerd ke eke parlamenter û wezîfedarî cewabê Heyetê Fetwayan nêdê, ê do gerrayê heyetî bikê.
