Walîtîya Amedî herinda Zekî Kanay, Ramazan Ozçelîk û Nursele Ornek ê ke weçînayîşanê 31ê adare de sey endamanê Meclîsê HDPyî yê Şaredarîya Baglarî ameyî weçînayene û wezîfeyanê xo ra 16ê kanûne de ameyî dûrvistene 3 kesê bînî sey qeyûm tayîn kerdî.

Walîtîye herinda Ramazan Ozçelîkî de Mudirê Perwerdeyî yê Mîllî Mehmet Emîn Akdogan, herinda Nursele Ornek de Şefê Mudirîyetê Perwerdeyê Mîllîyî Huru Atay Atici û herinda Zekî Kanayî de zî Mudirê Şubeyê Perwerdeyê Mîllîyî Îbrahîm Halîl Yuvanç tayîn kerdî.

6 Endamîyê Meclîsî Ameybî Xespkerdene

Wezaretê Karanê Zereyî verê cû zî bi bahaneyanê tehqîqatan û dewayanê înan 21ê teşrîna verêne de endamê meclîsanê HDPyî Nurettîn Bakan, Halîme Bayram, Husnu Aslan, Mehmet Akdogan, Panayir Çelîk û Naşîde Buluttekîn Can wezîfeyê înan ra girewtbi. 8ê teşrîna peyêne de walîtîye herinda înan de karmendê şaristanan ê bînan sey qeyûm tayîn kerdbi.

HDPyî weçînayîşê 31ê adare de Şaredarîya Baglarî de 37 endamanê meclîsî ra 30ê ci girewtbi. Wezaretê Karanê Zereyî 21ê teşrîna verêne de 6 endamê HDPyî yê meclîsî wezîfe ra girewtbi û na hûmara kewte bîye 24. Bi 3 endamanê bînan ê ke wezîfe ra ameyî girewtene hûmara endamanê HDPyî yê meclîsê Şaredarîye reyna kewte bîye 21.