Dima ke Şirnex û Êlih de domanî rastê hêrişê cînsîyî ameyî çalakîyê protestyî bi zêdbîyayîşî dewam kenê. Hêrişî Mêrdîn û Şirnex de ameyî protestokerdene.

Mêrdîn

Meclîsê Cinîyan ê HDPyî yê Mêrdînî hêrişo cînsî yo ke Şirnex de hetê çawişêkê pisporî ra vera domanêka 13 serre ame kerdene, pê eşkerayîyêka çapemenîye şermezar kerd. Nameyê Meclîsê Cinîyan ser o Adîle Konuş Kizilay qisey kerd.Adîle îfade kerd ke seba ke AKP verê îstîsmara nêgêno, hêrişê îstîsmarî zêdîyayî. Adîle vat: ''Bêcezaverdayîş bingeyê nê hêrişan virazeno. Ganî koeml vera nê hêrişan tewirê xo bimojno.''

Şirnex

Şirnex de rayberîya KESKî de verê bînaya Egitim-Senî de eşkerayîye ameye dayene. TJA, HDP, dezgehê bînî û xeylêk kesî tewrê eşkerayîye bîyî. Vervatoxa KESKî Serape Ok qisey kerd û vat: ''Kesê ke destanê xo yê gemarinan danê domananê ma ro wa bizanê ke heta ke ma estbê ma do nêverdê şima ameyoxê domanan tarî bikerê. Ma do heta peyêne nê serebûtî teqîb bikerê.''

Qoser

Qezaya Qoserî ya Mêrdînî de komêka ciwanan hêrişê cînsîyî yê Êlih û Şirnexî şermezar kerdî. Ciwanî meydanê Ugur Kaymazî ra heta meydanê Azadîye pê sloganê ''Bêveng nêmane, eke bêveng bimane dore yena to zî'' rayîrî ra şîyî.

Ciwanî rayraşîyayîşî ra dima vila bîyî.