Hetkarê Serekê Pêroyî yê Partîya Merdiman û Azadîye Ahmet Kayayî ANFyî rê qisey kerd û pare kerd ke hişmendîya dewleta tirke her ca de hêrişê kurdan kena.

Kayayî da zanayene ke dewleta tirke nêwazena kurdî wayîrê destkewte, dezgeh, azadî bibê û wazena pêro kurdan çin bikera. Kayayî vat: ''Kamca de hêzêkê kurdan est bo dewleta tirke hêrişê ci kena. Dewleta tirke hêrişanê vera Başûrî de destkewteyêk nêvist dest û nika wazena binkewtişê xo bi îşxalê Rojawanî binimna. Na xeta asayîşî ya 30 kîlometreyan yena manaya ney. Eke destê ci ra bêro dewleta tirke dest nana pêro destkewteyanê kurdan.''

Kayayî îfade kerd ke dewleta tirke bîlasebeb qala Mûsil û Kerkûkî nêkena û vat: ''Eke îmkanê ci est bı dewleta tirke seba îşxalê nînan têgêrena. Verê kurdan de dafikêka pîle est a. Ganî kurdî hêrişê vera parçeyêkî sey hêrişê vera temamîya Kurdîstanî biercnê. Ganî vera dewleta tirke tewirê xo yew bibo. Eke ma nêeşkê ney bikerê ma do hîna zaf dejan biancê.''