Heyetê HDPyî seba pêvînayîş û zîyaretanê şarî Çewlîg de yo. Heyet de Serekwekîlê Grûba HDPyî Saruhan Oluç, Wekîlî Mahmut Celadet Gaydali, Erdal Aydemîr, Gulîstane Koçyîgît, Şevîne Coşkun û Rêxistina HDPyî ya Çewlîgî ca gênê. Heyetî Bongilan û merkezê Çewlîgî de esnafî zîyaret kerdî û şarî reyde ronişt.

Qezaya Bongilanî de esnafan bi eleqeyêkê pîlî heyet pêşwazî kerd. Şarê Bongilanî ard ziwan ke ekonomî vera bena xirabêr, bêkarîye zêde ya, rayîrê dewanê înan nêvirazîyenê.

Heyetî dima merkezê şaristanî de, verê bînaya HDPyî de eşkerayîye daye. Saruhan Oluçî tîya de qisey kerd û ard ziwan ke HDP rixmê pêro tedayan zî partîyêka xurt a. Oluçî vat: ''Weçînayîşî verê ma de yê. No weçînayîş do qerar bido se beno. HDP zî nê weçînayîşî de wayîrê rolê mefteyî yo ke no mefte eşkeno pêro kilîdan abikero. Ne îtîfaqê Cumhurî ne zî îtîfaqê Miletî bê HDP nêeşkeno ser bikewo. A raşt nê wird îtîfaqî derheqê meseleya kurdan, heqanê merdiman de wayîrê sabiqayan ê.

Ma do nê weçînayîşî de kêmasî û xelatîyanê xo zî raşt bikerê. Îqtîdar mîyanê dizdîye, bêusulî û sûcan de yo û seba ke nê çîyan binimno hêrişê HDPyî keno, kurdan rê dişmenîye keno. Têna tîya de nê Rojawan de zî dişmenîya kurdan keno.''