Rojhelatê Kurdîstanî û Îran de serewedaritişê şarî dewam keno. Xeylêk şaristanan de grevî ameyî kerdene, şaristanê Ciwanroyî yê Rojhelatê Kurdîstanî zî seke vurîyayo leşkergehêkî.

Ciwanro de sekbanî serê bînayanê hukmatî de ameyî cakerdene. Xeylêk taxan de sereştişê keyeyan dewam keno. Polîs şarî terorîze keno.

Seba Burhan Îlyasîyo ke amebi qetilkerdene, yewşeme merasîmê cenaza ame kerdene. Merasîmî ra dima Muxafizanê Şorişî yê Îranî eşt keyeyê Îlyasîyî ser. Sereştiş de Halîd Îlyasîyo ke birayê Burhan Îlyasîyî yo ame destbendkerdene.

Dîya zanayene ke wextê sereştişî de hêzanê dewlete keyeyî rê gef wendo û seba Halîd Îlyasîyî vato 'Bişens o ke nêmerdo.'

Merasîmê cenaza ra dima roja yewşemeyî 6 ciwanê bînî hetê dewleta Îranî ra ameyî remnayene û aqîbetê înan nêzanîyeno. Nameyê 6 ciwanan wina yê: Ûsame Yoûsefî, Îdrîs Badîeî, Yahya Abdî, Yaser Hedayatî, Shahîn Khodamoradî û îdrîs Fathî.

Goreyê Rêxistina Heqanê Merdiman a Îranî 16ê êlule ra nata tew rtay 476 kesî hetê hêzanê dewlete ra ameyê qetilkerdene ke 64ê înan doman û 34ê înan zî cinî yê û 100 çalakîkeranê tepişteyan ser de zî gefê dardekerdişî est o.