Têgêrayîşê îşxalkerdişê dewleta Tirkî yê der û dorê Bradost, Xakurkê û Lolanî dewam keno. Bi nê amancî şewa 28'ê Gulane Koyê Şekîfî, der û dorê Çemê Lolanî û Girê Şehîd Dervîşî bi saetan hetê teyareyan û helîkopteranê şerî ra ame bombardûmankerdene. Artêşa Tirkî dimayê bombardûmankerdişî eskerê xo serê Koyê Şekîfî û Girê Şehîd Dervîşî de ronayî û waşt îşxalkerdişê xo hîratir bikera.

Hêzanê gerîlayan zî vera hêrişanê îşxalkerdişî yê dewleta Tirkî vizêrî şan de kewt mîyanê têgêrayîşî. Goreyê zanayîşê ke çimeyanê herême ra ameyê girewtene, hêzanê gerîlayan eskerê Tirkî yê ke serê giranê herême de ca dayo xo kerdî hedef. Vizêrî şan saete 21:00 de hêzanê gerîlayan eşt serê eskeranê serê giranê Lêlîkan, Şehîd Botan û Şehîd Şahanî. Hêzanê gerîlayan bi çekanê giranan û çalakîyanê sabotajî, eskerê serê hîrê giran eştî. Çimeyê herême vanê, nêtîceyê çalakîyanê gerîlayan de xeylî eskerê Tirkî merdî û bî birîndar. Ame zanayene, eskerê merdî û birîndarî bi helîkopteran herême ra ameyî wedaritene.