Riyad Selahaddîno ke Qamişlo ra yo, verî mîyanê artêşa tirke û hêzanê 'Roje' û hêzanê Zêrevanî yê PDKyî de fermandarîye kerde.  Riyad Selahaddîn nika mîyanê QSDyî de xebitîyeno.

Selahaddînî ANFyî rê qala ci kerde ke PDKyî senî seba mudaxeleyê Rojawanî Hêzê Roje awan kerdî.

Riyad Selahaddînî îfade kerd ke PDKyî 2011 de  Hêzê Roje awan kerdî û vat: ''Binê sîwana Zêrevanî de, 2011 de bi nameyê 'Leşkeranê Roje' ma Tabûrê Xinisî awan kerdî. Dima taburê bînî ameyî awankerdene. Ez û Bedel Bendî ma îdarekarê Alaya 1. bîyî û ma perwerdeyê înan zî hetê fermandaranê Zêrevanî ra ame dayene. Hêzê Zêrevanî zî 2003 de hetê Ezîz Weysîyî ra binê sîwana PDKyî ronîyabi. Ezîz Weysî keso vakurij bi û PKKyî ra remabi.  2012 de ma Mesûd Barzanîyî de pêvînayîş kerd. Barzanîyî ma rê vat ke o hîseyê xo ra meaş dano ma. Ma vat ke ma pere nêwazenê û nêwazenê partîyanê Rojawanî rê pabeste bibê. Ey zî soz da ma û vat 'Şima do leşkerê Barzanîyî bibê.' 

Wexto ke ma Alaya 2. awan kerde, Rojawan de zî YPG ronîya. Serranê 2013-14 de hînî ENKS û PDK-Syî xo ma rê ferz kerd. Alaya 3. bi temamî endamanê ENKSî ra ameye pê. Barzabîyî soz dabi ma ke ma do partîyanê sîyasîyan rê pabeste mebê la sozê xo nêard ca. O çax perwerdeyan de tim seba PKKyî çîyê xirabî ameyêne vatene. Bi taybeyî ENKSî bi xirabî propagandaya Şorişê Rojawanî kerdêne. 

Wexto ke mi dî fermandaranê tirkan perwerde dayêne hêzanê Roje û Zerevanî, hînî ez pê her çi hesîyaya. Goreyê agahîyanê ke resayêne mi destî PDKyî tay hêzê xo şawitêne Tirkîya û MÎTî perwerde dayêne înan. Bi nê hawayî 6-7 serran de pêro hêzê PDKyî kewtî destê MÎTî. Ê çaxan hetê bînî ra têkoşînê YPG-YPJyî, Xoverdayîşê Kobanê zaf tesîrê mi kerdêne. La PDK, ENKS sey ewro YPG, QSD û YPJ qebul nêkerdêne. Bi nê hawayî ez ENKS û PDK ra kewta dûrî. 

2015 de Koalîsyonê Mîyanneteweyî waşt ke hêzê Roje QSDyî reyde vera DAÎŞî Rojawan de şer bikerê. La ENKSî no qebul nêkerd. Hêzanê Roje waşt Rimêlan û Qereçox de bimanê û seba petrolî no waştêne. Mi waşt ez YPGyî reyde şer bikera. 2016 de ma waşt derbazê Rojawanî bibê la Hewlêr de ma tepişîyayî. 4 mengan ez zîndan de menda, Fermandarîya Zêrevanî de ez tewrê wezîfeyê pasîfî ameya kerdene. Gulana 2008î de ez bi temamî înan ra cîya bîya û ameya Rojawanî.''

Riyad Selahaddînî da zanayene ke PDKyî hêzê xo yê Gulane sewqê waranê gerîlayan kerdê û vat: ''Nê hêzî waranê gerîlayan gênê binê ablûqa. Şer de aktîf nîyê la leşkerê tirkî nînan şuxilnenê. Leşkerê tirkî pê kincanê înan, pê wesayîtan derbazê waranê gerîlayan benê û hêriş kenê. Gerîlayê PKKyî seba pêro Kurdîstanî şer kenê ke no seba ma sereberzî ya. Artêşa tirke vera gerîlayan çeka kîmyewîye xebitnena. Wa PDK hemkarîya dişmenî war verdo. Ganî rojawanij û başûrijî vera kurdan şer mekerê. Ez venga hêzanê PDKyî û hêzanê Roje dana ke vera PKKyî şer mekerê. Çeka xo vera bidê û keyeyê xo de ronişê.''