Riyad Selahaddîno ke Qamişlo ra yo, verî mîyanê artêşa tirke û hêzanê 'Roje' û hêzanê Zêrevanî yê PDKyî de fermandarîye kerde.  Riyad Selahaddîn nika mîyanê QSDyî de xebitîyeno.

Riyad Selahaddînî ANFyî rê qisey kerd û da zanayene ke wextê serebûtanê 1991î de PKKyî Zaxo destê rejîmê Baasî ra xelisnabi. 

Riyad Selahaddînî vat: ''1991 de wextê serewedaritişê Başûrî de warêko leşkerî yê bi nameyê 'Wareyê Sifirî' est bi. Uca de gerîla û pêşmergeyî pîya bîyî. Eke gerîlayî tewrê nê serewedaritişî nêbîyêne Baas bo nêkewtêne. Gerîlayan nê şerî de bi taybetî Zaxo de rolêko pozîtîf kerd. Temamîya Zaxoyî hetê PKKyî ra ameye xelisnayene. PKK Dihok de zî tewrê şerî bi, ame Koyê Sipî. Ez uca de bîya, qasê 200 gerîlayanê PKKyî pêşmergeyan ra ver vera Baasî şer kerd. Artêşa Iraqî Quweyt de vera cinî û domanan kerdişê xirabî kerdêne. Saddamî 1988 de Helebçe de çekê kîmyewîyî xebitnabî. Dima agahîya winasêne vila bîye ke Saddam do reyna çeka kîmyewîye bişuxilna. Coka qasê mîlyonêk merdiman koçê Îran û Tirkîya kerd. La gerîlayî mendî û înan vera Baasî şer kerd. Wextê koçkerdişî de zî gerîlayan Şêladizê û Balinda de hetkarîya ma kerde, werd da ma û domanê ma derbaz kerdî.

Ma Çelê û Deştanî de kampan de mendî. Vakurijan bi wesayîtan ma rê betanîya û werd ardî. Şarê Vakurê Kurdîstanî her roje ameyêne û ardim ardêne ma. Înan ma rê vatêne 'şima şarê ma yê.' 3 mengan ra dima tedaya Neteweyanê Yewbîyayeyan (NY) û Hêzê Çekîçî yê artêşa Iraqî ra ma agêrayî Başûrî. Ez zî tewra pêşmergeyan bîya û mi Silêmanî de perwerde girewt. 31ê tebaxa 1996î de ez koyê Kepike Hamed Axayî de fermandarê tîmêka PDKyî bîya. A roje qiseyê 'Şorê Hewlêr' ser o ma şîbî Hewlêr. Hewlêr de tank, top û helîkopterê Saddamî est bîyî û serê înan de hêzê PDKyî est bîyî. O çax Hewlêr destê YNKyî de bi la nêeşkayêne zaf xo ver bido. Dima YNKyî bi hêzanê Îranî Silêmanî girewt. O çax kombîyayîşêk de mabênê YNK û PDKyî de Başûrname parçekerdene. 

PDK heman zî wina yo; seba menfaatanê xo têgêreno. Wextê hêrişanê DAÎŞî de ez Hewlêr de mîyanê hêzanê Zêrevanî de wezîfedar bîya. PDKyî ferman da pêşmergeyan de Şingal de arşîvê xo bivêşnê û uca ra vejîyê. Tirkîya, DAÎŞ û Şingalî bi birêke Şingal teslîmê DAÎŞî kerd. Dima DAÎŞî hêrişê Mexmûrî kerd û verê xo da Hewlêr û Dihok. Şarî panîk kerdêne. Selahîyetdaranê PDKyî seba ke pêkerdiş zanayêne Şingal û Mexmûr verda. Gerîlayî resayî Şingal û Mexmûr. Ney moral da şarî. Xoverdayîşê gerîlayan ê vera DAÎŞî ra nêbîyêne Hewlêr û Dihok kewtêne destê DAÎŞî. Êzidîyan zî bi rayîrê PKKyî xo şinasna, rêxistin kerd û îdareyê xo rona.

Ewro PKK nê şarê Şingalî xo paweno û îdare keno. Ganî PDKyî ney rê hûrmet bikerdêne, mîyanê kurdan de ganî dîyalogî bibîyêne, PDKyî ganî Şingalî ra nêremayêne. Şarê Şingalî PDKyî nêwazeno. Artêşa Iraqî şina serê Şingalî û PDK zî Şingalî keno hedef. No şerm o.''