Endama Komîteya Merkezî ya PKKyî Hêlîne Umît bernameyê taybetî yê Medya Haber TV de rojdem ercna.

Qiseykerdişê Hêlîne Umît ra tay noqtayê girîngî wina yê:

''43 serran ra dima Îmrali de Rayber Apoyî reyde pêvînayîş ame kerdene. Dewleta tirke netîceya xoverdayîşê Rayber Apoyî û şarê ma de neçare menda ke destûrê nê pêvînayîşî bida. Rojhelatê Mîyanênî de şer beno xorin. Merkezê nê şerî zî Îmrali yo. Dewleta tirke wina hesab kerdêne ke Rayber Apoyî vera şarê kurdî sey rehîne bitepişa û pêro waştişanê xo serê şarê kurdî de bîyara ca la hesabê ci pûç bîyî. Şarê kurdî têkoşînêko xurt kerd û dewleta tirke neçare menda ke apey game bierza.

Seke Rayber Apoyî pêvînayîş de vato; tecrîd ho dewam keno. La ma dî ke eke ma têkoşînê xurtêrî bikerê eşkenê tecrîdî parçe bikerê û azadîya Rayber Apoyî bîyarê ca. Ma hê wextê azadîye de yê. Ma nêeşkenê ney ra apey şorê. Ganî ma seba azadîya Rayber Apoyî her ca de têkoşînê xo xurtêr û pîlêr bikerê. Ganî Tirkîya de zî yew înîsîyatîfê azadîye bêro caardene. 

Koln de şarê ma îradeyêko xurt mojna ra. Girîng o ke çalakîyê Kolnî pêvînayîşê bi Rayber Apoyî ra dima ameyî kerdene. Xora ma dekewtî serra diyîne ya Hemleya Azadîye. Ganî çarçewa ney Kurdîstan, Rojawan, Kibris, Ewropa ûsn. de çalakîyê  seba azadîya Rayber Apoyî bêrê zêdekerdene.

Herêmanê Pawitişî yê Medya de zî Vakurê Kurdîstanî de zî şer bi giranî dewam keno. Xora HPG tim bîlançoya şerî eşkera kena. Tewr peyên çalakîya TUSAŞî derbêka pîle daye sîstemî ro. Ez şehîdanê fedayîyan embazanê ma Asya û Rojgerî selam kena. Înan îsbat kerd ke milîtanê Rayber Apoyî nênê binvistene. Wa her kes bizano ke eke hêrişî dewam bikerê çalakîyê xopawitişî zî do dewam bikerê.

Embaza ma Asya vejîyayîşêko pîl kerd. Aye xeta Zîlane ser de çalakîya xo kerde. Embaze Asya mojna ke welatperwerîye ganî seba bêra kerdene. Ganî her kes wayîrê wasîyetê embaze Asya vejîyê. 

Embaz Rojgerî rixmê ciwanîya xo zî tewirê Apogîrbîyayîş veto werte. Ez venga pêro ciwananê Kurdîstanî dana ke embaz Rojgerî xo rê bikerê sembol, rêçê ey de têkoşîn bikerê.

Qiseyê Bahçelîyî zaf provakatîf ê. Ma eşkenê vajê ke werte de kerdişê şerê taybetî est ê. Erdogan û Bahçelî faşîst ê. Nika Tirkîya de zî kaosê pîlî, herimîyayîş û krîzo ekonomîk est ê. Bê kurdan tirkî, bê tirkan kurdî nêbenê. No qiseyo ke aîdê Rayber Apoyî yo hetê Bahçelîyî ra ameyo vatene. Rayber Apoyî tim bi samîmîyetî kerd ke komelê Tirkîya roşnî bikero. Vera PKKyî hêrişê şerê taybetî est ê. Tayênî vanê ke PKK wazeno dewletêka newîye awan bikero. PKK wayîrê paradîgmayêka dewlete nîyo. Seke Rayber Apoyî vatbi PKK nêwazeno dewletêke awan bikero. PKK demokrasî û têdûştîye wazeno.

Tayê bînî zî vanê ke Rayber Apoyî çîyêk waşto la PKKyî qebul nêkerdo. Ez vaja; çîyêko winayên çin o. Çunke Rayber Apoyî ra ma rê çîyêk nêame. Ma ganî Rayber Apoyî teqîb bikerê, vera tecrîdî venga xo berz bikerê, peyê raştîye de şorê û têkoşîn bikerê. Ney ra ber çîyê ke vajîyenê û yenê kerdene raşt nîyê. 

Ez xoverdayîşê Êlihî selam kena. Bi taybetî ciwanî bi xurtî vera destsernayîşê îradeyî tewirê xo mojnenê ra. Ma dî ke ciwanê ma tim payan ser de yê. Kurdîstan de vera polîtîkayanê qeyûman û îşxalî tewirêk est o. Şarê ma qeyûman qebul nêkeno. Qeyûm hacetêkê kolonyalîzmî yo. Xora ciwanî do vera ney têkoşîn bikerê. Ma bi bawer ê ke têkoşînê ciwananê ma do ser bikewê.

Roja Têkoşînê Vera Şîdetê Serê Cinîyan a 25ê Teşrîna Peyêne zaf girîng a. Sîstemo nikayên heyf ke camêrdperest, cînsîyetperest û qirker o. Cinîyî ganî vera nê sîstemî paradîgmaya xo ya hempare awan bikerê. Rojêke çin a ke cinîyî nêrê qetilkerdene. Ez venga pêro cinîyanê Kurdîstan û Tirkîya dana ke wa rêxistinîya xo awan bikerê. Cinîyî ganî bingeyê xopawitişî de têbigêrê. 

Ez serrgêra ronîyayîşê partîya ma 27ê Teşrîna Peyêne fîraz kena. Partîya ma morê xo da binê tarîxî, bi hêzêko girîng. Ewro bê partîya ma çew nêeşkeno Rojhelatê Mîyanênî ser o hesaban bikero. Xora xêrê şehîdanê xo ra ma hendê bihêz ê. Bi na wesîle ez şehîdanê ma bi hûrmet û minetî selam kena. PKK do tim bi qerardarî û îradeyê xo est bo. Ma do serra 47ine de zî têkoşînêkê bêhempayî bikerê. Ez venga pêro dost, embaz, welatperwer, cinî û ciwanan dana ke nê têkoşînî de cabigêrê.''