Hîrê aktîvîstî Bokan û Mahabad de ameyî yadkerdene
Rixmê teda û astengîyan zî seba hîrê aktîvîstanê ke hetê dewleta Îranî ra ameybî qetilkerdene, şaristananê Bokan û Mahabadî ya Rojhelatê Kurdîstanî de çalakîyê yadkerdişî ameyî kerdene.
Rixmê hêrişanê hêzanê dewleta Îranî zî xoverdayoxê ke hetê rejîmî ra ameyî qirkerdene, yenê yadkerdene.
Şaristanê Bokanî de Şehrîyar Mihemedî ame yadkerdene. Merasîm de kevokê sipîyî ameyî perrnayene.
Dewa Koste ya Bokanî de Mîlad Merûfî zî ame yadkerdene. Merasîm de dadîya ey vat: ''Lajê mi şehîdê rayîrê azadîye yo, şehîdê Kurdîstanî yo.''
Şaristanê Mahabadî de Mihemed Rehmanî dewa Qalûnzndanî de ame yadkerdene û merasîm de sloganê şorişgêrî ameyî vatene.
Netîceya hêriş û tedayanê hêzanê Îranî de xeylêk kesî Rojhelatê Kurdîstanî de ameyî destbendkerdene.
Roja yewşemeyî Muhsîn Sadiq Kirmanşan de ame destbendkerdene.
Hetê bînî ra Sine de Mehsa Qurbanîya ke amebî destbendkerdene ra xeberêke nêna girewtene.
Reyna 3 kesî Îran û Rojhelatê Kurdîstanî de ameyî qetilkerdene. Goreyê agahîyanê ke Komeleya Heqanê Merdiman dayê, Kamyaran de keso bi nameyê Ferşad Îbrahîm (40) ame qetilkerdene.
Goreyê aktîvîstanê heqanê merdiman ê Îranî qezaya Deştabî de Mêhrdad Meleko 17 serre û Hurmuzganîş de zî domano 12 serre ameyî qetilkerdene.
