Hemsereka Konseya Rayberdişî ya KCKyî Besê Hozat bîye meymana 'Bernameyê Taybetî' yê Medya Haber TVyî. Hozate xeylêk babetî ercnayî û bale ante hêrişanê îşxalî yê dewleta tirke yê vera Başûrê Kurdîstanî.

Qiseykerdişê Hozate ra beşêk wina yo:

"Dewleta tirke wazena esasê Mîsak-i Mîlî ser o pêro Kurdîstan îşxal bikera. Nika Başûr de hêrişê îşxalî estê. Her cayê Başûrî de baregeh û leşkerê dewleta tirke estê. Ganî na babete de îtîfaq û têkilîya PDKyî ya bi AKP-MHPyî bêra nîqaşkerdene. Nê hêrişê vera Başûrî bi paştdayîşê PDKyî yenê kerdene.

Tewr peyêne YNKyî zî eşkerayîye daye. Selahîyetdarê YNKyî Salih Pîreyî vatbi xebera înan pê peymana Hewlêr-Bexdadî çin a û dewleta tirke Bahdînan îşxal kerd.YNK zî rewşe ra terseno. Çunke Başûr yeno îşxalkerdene. Selahîyetdarê YNK, Goran û rêxistinê bînî qesawetê xo anê ziwan. 

Nê îqtîdarê faşîstî mîsal Garê de çi soz da PDKyî. Pêşmergeyî nêşinê Herêmanê Pawitişî yê Medya, nêwazenê bibê parçeyêkê îşxalî. Coka PDK hêzanê Zerevanî beno. Cayan de ke dewleta tirke nêeşkena xo biresna ci hêzê Zerevanî yenê cakerdene. Nê cayî herêmê gerîlayan ê. PDK xîret keno ke mabênê gerîlayan û herême de têkilîye bibirno û dima dewleta tirke hêrişê gerîlayan bikera.

'Rewşa nikayêne zaf bitehluke ya'

Oyo ke nika amadekarîya ci yena kerdene şer o. Rewşa nikayêne zaf bitehluke ya. Wina aseno ke seke PDK û dewleta tirke pîya hêrişêkê hîrayî kenê. Amadekarîya înan pêro nê bingeyî ser o ya.

Eke ti hêzanê xo berî noqtayanê gerîlayan û uca de ca bikerî, qeraqolan virazî, îstîxbarat bidî û bikerî ke dewleta tirke hêrişê gerîlayan bikera nameyê ney çi yo? Nameyê ney dewleta tirke reyde îlanê şerî yo. No planêko zaf bitehluke yo. Planêko winasên PDK zî qedîneno û destkewteyanê Başûr,Rojawan, Vakur û Rojhelatî zî çin keno. Hînî Kurdîstano Federal zî nêmaneno.

Pîreyî vatbi eke mabênê PDK û PKKyî de şerêk biqewimo her kesî dekeweno binê nê şerî. Mesele mabênê PDK û PKKyî de nîya. Mesele mabênê kurdan û PDKyî de ya. PKK vera qirkerdişanê dewleta tirke kurdan paweno. Coka yew meseleya PKKyî çin a.

PDK vano sebebê vengbîyayîşê dewan PKK yo dewleta tirke nîya. PDK tedaya dewleta tirke nêvîneno la xoverdayîşê PKKyî vîneno.  No yeno manaya 'dewleta îşxalkere heqdar a, kurdê ke vera dewleta kolonyalîste û qirkere şer kenêi neheq ê. Vera dewleta tirke xo ver medê.'

PKK vera qirkerdişî têkoşîn keno, xo ver dano. Eke şima sebebê mesele sey PKK bimojnê o çax şima hêriş û qirkerdişê dewleta tirke kenê meşrû. Partîyêka kurdan senî eşkena vaja teslîm bibê, bêrûmetî û koledarîye kurdan rê ferz bikera? No nêno qebulkerdene.

Bêguman PKK çar parçeyanê Kurdîstanî de seba rûmetê kurdan xo ver dano, şer keno.  Îqtîdarê AKP-MHPyî turanîst, enwerperest, nîjadperest o. Dinya, Ewropa û welatê ereban zî dewleta tirke rê vanê îşxalker. La PDK nêeşkeno naye vajo.

'Polîtîkaya nikayêne ya PDKyî zaf bitehluke ya'

Polîtîkaya nikayêne ya PDKyî zaf bitehluke ya û zerarêkê pîlî dana kurdan, deskewteyanê kurdan rê gef wanena. Verê kurdan de na seserre de îmkan û firsendê pîlî estê. PDK statu û destkewteyanê kurdan visneno binê tehlukeyî, zera dano kurdan. PDK verê yewîya neteweyîye de astengêko pîl o. 

Ganî PDK bi ziwanêkê tûjî bêro rexnekerdene, vera ci teda bêra kerdene, verê na polîtîkaya PDKyî bêro girewtene û PDK bi zorî bêro antene xeta neteweyîye ser. Ganî PDK hetê na dewleta qirkere de canêgêro, paştî nêdo ci û dewleta îşxalkere meşrû nêkero. Dewleta tirke vana kurdî hetê mi de yê û PDK sey mîsalê naye mojnena. Bi nê hawayî dewleta îşxalkere qirkerdişan kena. Coka ganî her kes nê tewirê PDKyî bi xurtî rexne bikero.

Eke Başûr de pêro hunermend, roşnvîr, sîyasetmedarî û şar vera PDKyî tewirê winasênî bimojnê, PDK biancê xeta neteweyîye ser rewşe vurîyena.

PDK ganî na polîtîkaya bitehluke war verdo, na polîtîka zerar dana kurdan û PDK. Eke kurdê xoverdayoxî bêrê tasfîyekerdene kurdê xayînî zî do bêrê tasfîyekerdene. Ganî kurdî newe ra na trajedî û dram nêvînê. Tarîxê kurdan pê nê serebûtan pirr o.''