Merkezê Îrtîbatî û Çapemenîye yê HPGyî derheqê çalakîya fedayî ya vera bînaya polîsan a Mersînî de eşkerayîyêke daye.

Eşkerayîye wina ya:

''26ê êlule de di embazanê ma yê fedayîyan qezaya Mezîtlî ya Mersînî de vera hêzanê dişmenî çalakîyêka fedayîye kerde. Na çalakîye vera teda û qirkerdişê zîndanan û vera hêrişanê kîmyewîyan sey cewabêkî ameye kerdene.

Embazanê ma Sara û Rûkene perspektîfê tîma fedayî ya gerîlayan xo rê kerd esas, koyan ra kewtî rayîr, torra îstîxbaratî ya dişmenî derbaz kerde û bi serkewtişî resayî hedef. Rejîmê AKP-MHPyî seke hakîmê Tirkîya yo, komelî ser o her çî zaneno, ajanê ci her ca de yê wazeno komelî bigêro binê hukmê xo. La heta ke ma eşkera kerd dişmen nêeşka derheqê çalakîye û nasnameyê embazanê ma de bireso agahîyêke. Hukmatê AKP-MHPyî seba ke qelsîya xo binimno senaryoyêko sexte pêşkêşê şarî kerdo.

Tîma ma ya fedayîye serkêşîya embaze Sara dde bi profesyonelî resaye hedefê xo. Embazê ma Sara û Rûkene bi ruhê fedayî, çêrî, xobawerî û qerardarî şîyî serê dişmenî. Înan înîsîyatîf girewt, verî pê tebanca, dima zî pê çeka otomatîke da dişmenî ro. Tîma ma ya fedayîye seba ke şorê serê dişmenî û çalakîyêka fedayîye bikerê xo rêxistin kerd. Hetê bînî ra embazanê ma seba ke sivîlî zerar nêvînê bi hawayêkê profesyonelî na çalakîye plan kerde. Embazanê ma no plan bê kêmasî ard ca, vera hêzanê dişmenî şer kerd û dima ke hêzê dişmenî antî xo ser çalakîya fedayîye kerde û şehîd bîyî. Çalakîya embaze Sara û Rûkene ya fedayîye mojna ke tîmê gerîlayan ê fedayî yê otonomî û milîtnaê fedayî yê Apogîrî kamca de û kamyew aste de biwazê wina eşkenê her çî bikerê.

Sara Tolhildan

Dewleta tirke 2021 de warê Sîyanê yê Garê ra dest pêkerd û vera Zap, Metîna û Avaşînî 2021-2022 de 2568 reyî çek û bombaya kîmyewîye şuxilnaye. Nê hêrişan de 66 embazê ma şehîd bîyî. La her kes nê sûcê şerî yê dewleta tirke peygoş kerdî, tewir nêmojna. Embaze Sara wextê operasyonê vera Garê de 2021 de asta fermandarîye de vera hêrişan de têkoşîn kerdbi. Embaze Sara nê embazan ra yew bîye ke seba ke mudaxeleyê hêrişî bikera bêteredut  şîye serê dişmenî û resaye Kampa Sîyanê. Embaze Sara tîya de binê tesîrê gazanê kîmyewîyan de mende. Şehadetê embaz Şoreş Beytuşebab û embazanê bînan zî zaf tesîrê aye kerd, aye soz da ke qesasê înan bigêra û coka na çalakîye fedayîye kerde.

Hukmatê AKP-MHPyî nêeşka nameyê nê embazanê ma eşkera bikero. No zî qelsîya îstîxbaratê înan mojneno. Hukmatê AKP-MHPyî zanayêne ke embaze Zozane Tolan na çalakîye de çin bîya la qestî ra nameyê aye da û tedaya keye û dormeyê aye kerd. Yew eleqeyê embaze Zozane bi na çalakîye çin o, a serê wezîfeyê xo de ya. Hukmatê AKP-MHPyî na çalakîye ra zaf kesî destbend kerdî, şarî rê teda û îşkence kerd û bi nê hawayî zî waşt ke qesasê xo bigêro. Nê pêro xîretê binkewtişê vera çalakîya ma ya fedayîye û xîretê nimnayîşê nê serebûtî ra yê.

Rûkene Zelal

Hukmatê AKP-MHPyî dîyar nêkerdo ke embazê ma yê fedayîyî ça ra ameyê û na çalakîye kerda. Hukmatî qestî ra keno ke çalakîye hetê Rojawanî ra ameya kerdene. Embaze Rûkene wextêkê dergî ra nata milîtana PKKyî ya û endama Hêzanê Taybetan a. Yew eleqeyê aye bi rêxistinanê Rojawanî çin o. Coka îdîaya hukmatî zûr a ke hukmatê AKP-MHPyî seba ke hêrişê dişmenanê xo bikero na zûre kerde.

Nê prosesî de ke kardîya qirkerdişî  serê qirixê şarê ma de ya, vera tepişteyan kerdişê xirabî est ê, şarê kurdî bi metodanê cîyayan yeno qetilkerdene û embazê ma pê çekanê kîmyewîyan yenê şehîdkerdene wa çew milîtananê fedayîyan ê Apogîran ra têgêrayîşêkê cîyayî nêpawo. Êyê ke fek erzenê nê çalakîyanê bêhempayan ganî verî biewnê hêrişanê kîmyewî û namerdan ê vera gerîlayan ra. Eşkera yo ke kesê ke hêrişanê kîmyewîyan ê rejîmê faşîstî şermezar nêkenê la fedayîyanê ma bi ziwanê dişmenî şermezar kenê kewtê binê kontrolî. Embazê ma yê ke seba ke qirkerdişê vera kurdan vindarnê xo feda kenê, erjê ma yê tewr fîraz ê. Wa bizanîyo ke nê kesî ne şarê ma yê welatperwerî ne zî fedayîyanê raştîye temsîl kenê.

Heta ke rejîmo faşîst ê AKP-MHPyî îşkenceyê vera zîndanan, qirkerdişê vera şarê ma û hêrişanê kîmyewîyan ê vera şarê ma nêvindarno çalakîyê ma yê winasênî zî do dewam bikerê.

Nasnameyê nê wird embazanê ma yê fedayîyan wina yê:

Nameyê Qodî: Sara Tolhildan Name û Peyname: Dîlara Urper Cayê Bîyayîşî: Şirnex Maye-Pî: Pîroze– Hamdî Tarîx û Cayê Şehadetî: 26ê Êlula 2022yî / Mersîn

Nameyê Qodî: Rûkene Zelal Name û Peyname: Emele Feremez Hisên Cayê Bîyayîşî: Qamişlo Maye-Pî: Faîze – Feremez Tarîx û Cayê Şehadetî: 26ê Êlula 2022yî / Mersîn