Artêşa tirke ya îşxalkera ke Zap de tengayî ancena reyna bi çekanê kîmyewîyan û bombayanê qedexeyan hêriş kerd. Rojanê peyênan de Girê Amedîye û Girê Cûdî de sûcê merdimîye yeno kerdene.
Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişê artêşa tirke de eşkerayîye daye.
HPGyî vat: “Artêşa tirke ya îşxalkera ke heme çekê xo yê şerî vera Herêmanê Xoverdayîşî yê Zapî û tunelanê şerî şuxulnayî, netîce dest nêfîna. Rixmo ke bêmabên bi teyarayanê şerî, helîkopteranê hêrişî, tankan, topan û obusan, bi çekanê giranan û otomatîkan hêrişê mewzîyanê gerîlayan kenê, heme hêrişê dişmenî ameyî betalkerdene. Artêşa tirke 9ê êlule de kerd ke hêrişê îşxalî xeta Girê Amediyêra ver bi Metîna hîra bikero. Rixmo ke artêşa îşxalkere xayînan ra paştî girewt nêeşkayî biresê hedefê xo. Bi bombayanê qedexeyan hêriş kerd. Rojanê peyênan de Girê Amedîye û Girê Cûdî de sûcê merdimîye yeno kerdene. Ma heme şarê xo yê welatperwerî û rayrapêroyîya Tirkîya derheqê sûcanê şerî yê dewleta tirke de hayîdar kenê û veng danê ke wa hîsgêr bê.”
Derheqê çalakîyanê gerîlayan û hêrişê artêşa tirke de nê ameyî vatene:
“Herêma Zapî;
29ê êlule de Warê Xoverdayîşî yê Girê Cûdîyî de saetanê serê sibayî de çekê obusî yê îşxalkeran ame pirodayene û derbkerdene. Saetanê şanî de eynî warî de vera îşxalkeran çalakîya suîkastî ameye kerdene, îşxalkerêk ame cezakerdene. Na çalakîye hetê hêzanê ma yê YJA Starî ra ameye kerdene.
Herêma Metîna;
27ê êlule de Warê Xoverdayîşî yê Girê Çarçel de îşxalkerî bi çekanê giranan ameyî pirodayene û derbkerdene. Na çalakîye hetê hêzanê ma yê YJA Starî ra ameye kerdene.
Herêma Xakurkê;
28ê êlule de Warê Girê Şehîd Derwêşî de çeka A4î ya îşxalkeran ame pirodayene. Na çalakîye de mewzîyêka A4î bi temamî ameye îmhakerdene. Mewzî de 3 îşxalkerî ameyî cezakerdene. Na çalakîye hetê hêzanê ma yê YJA Starî ra ameye kerdene.
Hêrişê bi çekanê qedexeyan;
24 û 25ê êlule de Warê Xoverdayîşî yê Girê Amediyê de vera tunelnê şerî çekê kîmyewîyî ameyî şuxulnayene. Eynî rojan de Warê Xoverdayîşî yê Girê Cûdîyî de tunelê şerî bi bombayanê taktîk nukleerî ameyî bombardumankerdene û çekê kîmyewîyî ame şuxulnayene. 29 û 30ê êlule de Warê Xoverdayîş yê Girê Amediyê yê Zapî de bi teqaberê qedexeyî, bi droneyanê ke teqaber barkerdeyan dîyayî bombayan ver.
Bombardumanî;
29ê êlule de Warê Xoverdayîş yê Girê Baharî yê Zapî, warê Serê Metîna, Gundê Degelê, Golka yê Metîna bi teyarayanê şerî, warê Zap, Xakurkê û Metîna bi topan dîyayî bombayan ver.”
