Merkezê Îrtîbatî û Çapemenîye yê HPGyî bi eşkerayîyêke da zanayene ke artêşa tirke ya îşxalkere rojawan û rojhelatê Zapî ra xo apey anto. 

Eşkerayîye wina ya:

''Artêşa tirke ya îşxalkere bi armancê îşxalî 14ê nîsana 2022yî de hewayî ra û 17ê nîsane de zî erdî ra vera Zap, Metîna û Avaşînî têgêrayîşêkê îşxalî yo hîra dabi destpêkerdene. Gerîlayanê azadîye yê Kurdîstanî bi xoverdayîşêkê destanwarîyî, bi metodê şerî tim war û tunelê şerî bi profesyonelî şuxilnayî û bi taktîkanê afernayoxan ê gerîlayan vera hêrişanê îşxalî têgêrayî. Artêşa tirke 8 mengan cayan de ke hewayî ra hêzê xo ardî warî, seba tasfîyekerdişê serwerîya gerîlayan her ca de teknîkê şerî hewa û erdî ra şuxilna, bêmabên warê xoverdayîşî dayî bombayan ver, bi hezaran reyî çekê kîmyewîyî û bombayê qedexekerdeyî şuxilnayî û waşt ke netîceyêke bivisna destî. Labelê rixmê nê çîyan zî nêeşkaye planê xo yê îşxalî bîyara ca, heman wextî de derbê giranî gerîlayan ra werdî ke nê gerîlayan xo bi ruhê fedayî yê Apogîrî xemilnayo.

Bi taybetî operasyonanê şorişgêran de ke tewr peynî de 25ê teşrîna peyêne de Girê Cûdî de, 26ê teşrîna peyêne de Warê Xoverdayîşî yê Girê Hekarî de ameyê kerdene, derbê giranî dîyayî artêşa îşxalkere ro û bi nê derban rejîmê AKP-MHPyî lerza. Artêşa îşxalkere nê şerê bêemanî de kişteyê girîngî dayî û rixmê ney zî zerarê xo yê şerî qetî rayaumûmîye rê eşkera nêkerd.

Dima ke 5ê kanûne de Warê Xoverdayîşî yê Saca de serdarêk û tay payeberzî ameyî cezakerdene, artêşa îşxalkere leweyê Koyê Kurojahroyî, dewa Saca ya qezaya Şêladizê ra û dormeyê ci ra, Girê Şehîd Sîan û Dola Şehîd Kuncî ra û binkoyê herêma Zapî ra xo ant.

Artêşa îşxalkere pêro waranê Warê Xoverdayîşî yê Girê Cûdîyî ra remaye ke nê warî de bi fermanê Hulusî Akarî cenazayê leşkeranê xo vêşnabî. Artêşa tirke 11 û 12ê kanûne de waranê Warê Xoverdayîşî yê Girê Cûdî, Şehîd Kendal, Şehîde Şîlane, Şehîd Çekdar, Şehîd Baxtîyar, Şehîd Savuşka û Şehîd Leşkerî ra binê derbanê giranan ê gerîlayan de xo apey ant.

Artêşa tirke ya ke waştêne Girê Cûdîyî îşxal bikera û tede ca biba, bi nê armancî bi helîkopteran xeylêk malzemeyî ardî warî, seba ke nê malzemeyî nêkewê destê hêzanê ma xeylêk cayî vêşnayî, tayê ci kendalan ra eştî war û wexto ke bi panîkî remayêne xeylêk malzemeyî zî xo pey de verdayî. Halê hazirî de artêşa tirke dewa Saca û dormeyê ci yê rojhelatê Zapî û waranê teberî ra Girê FM û Girê Hekarî yê Zapî ra xo apey ant.

Bêguman artêşa tirke seba ke derbanê gerîlayan ra birema xo apey ant. Fermandarê ma yê Merkezê Pawitişê Şarî qiseykerdişê xo yê verênî de seba îşxalkeran vatbi ke 'ya xo apey bigêrê yan zî şorê, yan zî bimirê.' Beşêkê nê îşxalkerî bi çalakî û operasyonanê bêmabênan ameyî cezakerdene, êyê ke mendê zî seba ke xo bixelisnê neçare mendî ke biremê. Rejîmê faşîstî yê AKP-MHPyî bi mesuldarîya Erdogan û Akarî hende leşkerê tirkî 8 mengan şuxilnayî kerd ke 2700ê ci bikişîyê, xeylêk sûcê şerî kerdî û rixmê ney zî armancê xo nêeşka bîyaro ca. Na netîceya tarîxîye nîşaneya xurtbîyayîşê Gerîlayanê Azadîye yê Kurdîstanî ya, nîşaneya binkewtişê artêşa tirke ya. Heman wextî de nîşaneya cidî ya şikîyayîşê bingeyî yê dewleta tirke ya.''