Merkezê Çapemenîye û Îrtîbatî yê HPG’yî vat, “18’ê Gulane de yewîyêka kontrayî şal û şapikê gerîlayan dayê xo ra û wareyê Şehîd Mizgîne ya Bedlîsî de damî ronayî.”

Merkezê Çapemenîye û Îrtîbatî yê HPG’yî da zanayene ke şarê sîvîl ê ke şîyê îziman arê bidê, bîyî hedefa nê kontrayan û vat, “Nê hêrişê kontrayan de ciwano bi nameyê Davût Coşkûn ameyo qetilkerdene.

Dewleta Tirkî ya îşxalkare bi rayîrê medyaya xo no hêrişo ke vera sîvîlan viraşto erzena vileyê hêzanê ma. Dewleta Tirkî ya faşîste no hêriş kerdo û bi rayîrê medyaya xo wazena şarî bixapênayo. Başûrê Kurdistanî ra heta Vakurê Kurdistanî dewleta Tirkî xeylî hêrişî kerdî û seba nimitişê nê sucanê şerî heme metodanê qilêrinan bikar ana. Ganî şarê ma û rayapêroyî ya demokratîke goş nêdayo nê xeberanê înan ê zuran ser.

Nê hêrişî de ciwano bi nameyê Davût Coşkûn ameyo qetilkerdene û ma serweşîye keyeyê ey rê wazenê. Ma danê zanayene ke hêrişê vera şarê Kurdî tu cara bêcewab nêmanê.”

Merkezê Çapemenîye û Îrtîbatî yê HPG’yî da zanayene ke 7’ê Hezîrane de artêşa Tirkî ya îşxalkare vera Herêmanê Pawitişî yê Meyda zî bombardûmanî kerdê.

HPG’yî vat ke, “Teyareyanê şerî saete 09.30 de wareyê Kedakola yê Xinêrê, saete 22.30 de wareyê Newala Awa Basya ya Avaşînî û saete 23.50 de wareyê Saca û Şehîd Rustemî yê herêma Zapî bombardûman kerdî. Nê bombardûmanan de tu zirar nêresto hêzanê ma.”