Fermandarîya Eyaletê Heftanînî ya HPGyî bi eşkerayîyêka nuştekîye da pêhesnayene ke dewleta tirke bi nameyê seydwanîye û daristankarîye ajanan erşawena herêma Heftanînî. Fermandarîya Eyaletî pare kerd ke heta eşkerayîya diyîne înan seydwanîye û daristankarîye herême de vindarnayî.

Eşkerayîya Fermandarîya Eyaletê Heftanînî ya HPGyî de nê çîyî ameyî vatene: "Seke yeno zanayene îşxalkerê Kurdîstanî bi taybetî zî dewleta tirke bi armancê qirkerdişî û çinkerdişî yê şarê ma û gerîlayanê azadîya Kurdîstanî her tewirê metodanê gemarinan xebitnenê. Nê metodanê gemarinan ra yew zî cayanê gerîlayan de karê îstîxbaratî û ajankarîye yo. Dewleta tirke seba naye tay kesanê bêrûmetan xebitnena. Qasê ke ma zelal kerd û hayîya ma zî pê esta ke nê wextan de dewleta tirke ya îşxalkere bi nameyê seydwanîye, daristankarîye û bi bahaneyanê bînan kesê ajanî erşawena herême û bi rayîrê nê kesan wazena ke derheqê embazanê ma de qerargehanê ma de zanayîşan arê bida.  Seba ke ma bieşkê verê nê xebatanê dişmenan bigêrê ma sey Fermandarîya Eyaletê Heftanînî seydwanîya pêro herême qedexe kenê. Heta agahîyêka diyîne ganî kesêk herêmanê leşkerî de seydwanîye nêkero. Seba ke şaşîyêke nêra meydan, şarê ma yo welatperwer mexdûr nêbo ganî çew nêşoro seydwanîye. Eke şert û mercanê zimistanî ra hewceyê arêdayîşê daran estbo, ganî keso ke biwazo şoro daristanan ganî teqez dezgehê şarî yê Eyaletê Heftanînî reyde têkilîye bivirazo û bi belge bikewo herême. Ma hêvî kenê ke şarê ma yo welatperwer û dewijê herêma Heftanînî seba pûçkerdişê polîtîkayanê dişmenî do hetkarîya embazan bikê û na çarçewe de têbigêrê."