Merkezê Îrtîbatî û Çapemenîye yê HPGyî bi eşkerayîyêke da zanayene ke Bîlal Karakuş (Alî Haydar Dêrsim) şehîd bîyo. Eşkerayîye wina ya:

''Ewladê Dêrsimî yo qehreman, milîtanê PKKyî yo serkêş û fermandarê ma yo çêr embaz Alî Haydar 17ê temmuza 2022yî de şehîd bi. Ey 30 serran bêmabên koyanê Kurdîstanî ra heta koyanê Tirkîya warêkê pîlî de bi bawerîyêka pîle, fedakarîyêka berze û îradeyê asinînî têkoşîn kerd. Ma keyeyê ey ê ercîyayeyî û şarê Dêrsimî rê serweşîye wazenê. Sereyê pêro embazanê ke bi qerardarî her ca de têkoşîn kenê û sereyê şarê welatperwerî yê Kurdîstanî wa weş bo. Ma soz danê ke tim vîrameyîşê fermandarê ma yê ercîyayeyî Alî Haydarî gandar verbidê û armancanê ci yê fîrazanê ke ey seba înan emrê xo dayo, qetî bîyarê ca.

Nasnameyê embaz Alî Haydar Dêrsimî wina yo:

Nameyê Qodî: Alî Haydar Dêrsim Name û Peyname: Bîlal Karakuş Cayê Bîyayîşî: Dêrsim Maye-Pî: Zulkufe – Dogan Tarîx û Cayê Şehadetî: 17ê Temmuza 2022yî /Herêmê Pawitişî yê Medya

Şarê Dêrsimî pê xoverdayîşê xo tarîxê Kurdîstanî de wayîrê cayêkê girîngî yo. Şarê Dêrsimî rixmê hêrişanê îmha û qirkerdişî yê kolonyalîstan zî tim ziwan, kultur û nasnameyê xo pawitî. Dêrsim cayanê verênan ê têkoşînê azadîye ra yew o. Embaz Alî Haydarî zî Dêrsim de bi nê tradîsyonî dadîya xo ra beno. Embaz Alî Haydar pê hîkayeyanê Seyîd Riza, Elîşêr, Zerîfa û Besêyan beno pîl û dima PKKyî şinasneno.

Embaz Alî Haydar 1993 de bire dano ke verê xo bido koyan û têkoşînê ci yo 30 serre zî wina dest pêkeno. O nê 30 serran de tim xo rê serkewtişî esas gêno û pê têkoşînê xo beno layîqê Dêrsimî. O 1993 de hêverî Erzirom de dest pê gerîlatîye keno û dima çar serran Dêrsim de têkoşîn keno. O Dêrsim de beno fermandar û verê averşîyayîşanê pîlan keno a.

Embaz Alî Haydar 1998 de derbazê Dengizê Reşî beno û tîya de beno tersê îşxalkeran. 2001 de o reyna agêreno Dêrsim, derbazê Herêmanê Pawitişî yê Medya beno û tîya de tewrê tay perwerdeyan beno. Embaz Alî Haydar Qendîl de têkoşîn keno. Dima o 2003 de Amed de, 2004î ra heta 2009î de Dêrsim,  Qoçgirî û Dengizê Reşî de têkoşînî rê dewam keno. Embaz Alî Haydar 2009 de ancî agêreno Herêmanê Pawitişî yê Medya û tîya de Ocaxê PKKyî de bi perwerdeyan xo felsefeya Rayber Apoyî de aver beno.

Embaz Alî Haydar wextê hêrişanê DAÎŞÎ de sey fermandarêkê HPGyî Şingal de şarê êzidîyan paweno û serkewtişê gerîlayan ra dima agêreno koyan. Embaz Alî Haydar hem Dengizê Reşî û Dêrsim de hem zî Herêmanê Pawitişî yê Medya de fermandarîya eyaletan kerde û resa astêka pîle. O şexsê merdimê xo Aydino ke 1994 de Dêrsim de şehîd bibi, wayîrê têkoşînê pêro şehîdan vejîya. O tewrê çalakîyanê bêsînoran beno û rixmo ke çend reyî birîndar bîyo zî tim tewr vernî de cagêno. Embaz Alî Haydar tim xo rê esas keno ke xo biresno esterayan, hem cu hem zî şerê xo de xeta Rayberîye xo rê keno nimûne.

Embaz Alî Haydaro ke fedayîyê şarê ma û dewaya ma ya azadîye, milîtanê PKKyî yo asinîn, ewladê Dêrsimî yo xoverdayox bi, ma sere de keyeyê ey ê ercîyayeyî rê pêro şarê ma rê reyna serweşîye wazenê.''