Merkezê Çapemenî û Îrtîbatî yê HPG’yî derheqê çalakîyana qerîlayan de eşkerayîya nuştekîye weşanaye.

Eşkerayîye de ame vatene, “Çarçewaya Hemleya Şorişgêre ya Şehîd Bager û Şehîde Ronya de, çalakîyê hêzanê ma yê vera hêrişanê îşxalkaran dewam kenê. Artêşa Tirkî ya îşxalkara ke cehd kena ke erdê Başûrê Kurdistanî û wareyê gerîlayan îşxal bikera, netîceyê çalakîyanê xurtan ê hêzanê ma yê 29'ê Gulane de derbê giranî werdî. Zanayîşê hîrayî yê çalakîyan wina yê:

“Hêzanê ma saete 09:00, 13:00 û 14:00 de vera eskeranê îşxalkaran ê ke cehd kenê ver bi Girê Şehîd Şahanî yê herêma Xakurkê şirê de çalakîye viraşte. Netîceyê çalakîya ke bi taktîkê sabotajî ameya viraştene derbê giranî yewîyanê dişmenî rê ameyê pirodayene, 4 eskerî ameyî kiştene, eskerêk zî bi birîndar. Artêşa Tirkî ya îşxalkare dimaye çalakîye bi helîkopteranê bi tîpê Skorskyî cenazeyê eskeranê xo û yê birîndaran herême ra wedaritî.

Saete 11:00 de vera yewîyêka bîn a artêşa Tirkî ya îşxalkar a ke cehd kena ke Girê Şehîd Botanî de ca biba, hêzanê ma çalakîyêka bîne viraşte. Na çalakîye de 3 eskerê îşxalkaran ameyî kiştene, 2 eskerî zî ameyî birîndarkerdene. Eskerê birîndar bi helîkopteran herême ra ameyî wedaritene, labelê ame tespîtkerdene ke ê zî merdî û bi nê hawayî hûmara eskeranê dişmenî yê ke netîceyê çalakîye de merdê restê 5 eskeran.

Saete 14:00 de hêzanê ma vera îşxalkaranê Girê Lêlîkanî çalakîye viraşte. Derbê giranî dayî mewzî û stargehanê dişmenî ro, la hûmara merde û birîndaran nêameyê tesbîtkerdene.

Saete 04:15 de vera Qereqolê Şovê yê bajarokê Bajêrganî yê qezayaya Geverî ya Colemêrgî de hêzanê ma çalakîyêk viraşte. Derbêk dayê holikêka dişmenî ro û holike ameye rijnayene. Çalakîye de 2 eskerê dişmenî ameyî kiştene.

Hêzanê ma saete 15:00 vera artêşa Tirkî ya îşxalkar a serê Girê Xeregolê yê qezaya Çelê ya Colemêrgî çalakîyêk viraşte. Netîceyê çalakîye de derbê giranî dayî stargehanê dişmenî yê serê girî ro û 5 eskerî dişmenî ameyî kiştene. Artêşa Tirkî ya îşxalkare dimayê çalakîye obus û hawanî eştî der dor û no semed ra daristan de şewat vejîya.”

Xakurkê de tewr kêmî 9 eskerî ameyî kiştene

Eşkerayîye de hetê bînî ra xeberê medyaya Tirkî yê serê operasyonê îşxalkerdişê ameyê pûçkerdene û ame vatene, “Îşxalkaranê ke binê xoverdayîşê xurt ê gerîlayan de bin kewtê, seba vîndîbîyayanê xo yê zêdeyan, îdîa kerd ke xeylî gerîlayî şehîd bîyê, bi nê hawayî cehd kena ke binkewtişê xo wedaro û bi qareqara serkewtişanê sexteyan raya pêroyî bixapêna. Wextê destpêkê operasyonî ra heta nika teberê hemra Rêbazî gerîlayî tu vîndîbîyayîyê ma çin ê. Teyna herêma Xakurkê de çiqas ke ameyo tespîtkerdene 9 eskerê dişmenî ameyê kiştene. Wa şarê Kurdistanî yo welatperwer û rayapêroyî ya demokratîke bizano ke gerîlayê azadîya Kurdistanî goreyê wezîfe û mîsyonê xo vera her hêrişî bi zerrî û can ra xo ver ro danê û hêrişanê îşxalkerdişî yê îşxalkaran bin kenê. Gerîlayê azadîye yê Kurdistanî bi hêzo ke şehîdanê ma yê qehremanan ra, îdelojîyê cuya azad a Rayberîya ma û şarê ma ra gênê, naye ra tepîya zî vera hêrişan mîsyonê xo yê tarîx kî do bîyarê ca.”