Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişê artêşa tirke de eşkerayîye daye û nê pare kerdî:

''Çarçewa Hemleya Şorişgêre ya Cengê Heftanînî de hêzanê ma 22ê teşrîna verêne de vera leşkeranê ke Qilê Dupişkî yê Heftanînî de ameybî cakerdene têdima di çalakîyê suîqestî kerdî. Netîceya çalakîyan 2 îşxalkerî ameyî cezakerdene.

21ê teşrîna verêne de saetanê şanî de hêzanê dewleta Îranî warê Şehîd Cesurî yê Gelîya Marmişoyî yê pabesteyê Geverê Colemêrgî bi havan û obusan bombarduman kerdî.

Artêşa tirk a îşxalkere hêrişê Herêmanê Pawitişî yê Medya kerd. Detayê hêrişan wina yê:

19ê teşrîna verêne de saetanê şewe de xeta Boselê ya pabesteyê warê Kêre yê herêma Heftanînî hetê teyareyanê şerî ra ameyî pirodayene. Eynî şewe dormeyê Kanîya Skorskyî ya pabesteya warê Şehîd Rustemî yê herêma Zapî hetê teyarayanê keşîfî û bi hewayêkê hemwextî hetê obusan ra ameyî bombardumankerdene.

21ê teşrîna verêne de saetanê nêmroje de dormeyê dewa Çemrobotkî ya pabesteya herêma Garê hetê teyarayanê keşîfî ra ame pirodayene. Eynî roje saetanê şanî de kaşê Qilê Amedîye yê Amedîye ameyî bombardumankerdene. Reyna roja bîne zî teyaranê şerî herême ser o bombayî varnayî. Badê hêrişî herême de şewat vejîya û hêga û bostananê şarê sîvîlî zirar dî.

Şewa 21-22ê teşrîna verênde de herêma Qendîlî de warê Kozinê, Şehîd Harûn û Kalatuka û Qilê Şêx Nasirî yê pabesteyê warê Şehîd Munzurî hetê teyraryanê şerî ra ameyî bombardumankerdene. Eynî saetan de dewa Bolê ya Qendîlî û dewa Mawnanî ya pabesteya warê Balayanî zî hetê teyarayanê şerî ra ameyî pirodayene.

22ê teşrîna verêne de warê Werxelê yê Avaşînî û warê Kunişka yê Zapî ameyî bombardumankerdene. Netîceya nê hêrişan de vînîbîyayeyê ma çîn ê.''