Merkezê Îrtîbatî û Çapemenîye yê HPGyî da zanayene ke netîcaya operasyonanê leşkerîyan û bombardumanan de 6 gerîlayî şehîd bîyî.

Eşkerayîya HPGyî de nê ameyî parekerdene:

''9ê adare de saetanê cemê şanî de herêma Bagokî ya eyaletê Mêrdînî de operasyon ame destpêkerdene. Operasyono ke warê Kela Şehîdan de ame kerdene de hîrê saetî bombayî ameyî varnayene. Dima helîkopteran herême bobmarduman kerd û leşkerî herême de ca kerdî. Netîceya operasyonê di rojan û pêkewtişan de embazê ma Hewram, Rustem, Egîd, Rêbar û Serhat û welatperwerê ma yo bi nameyê Hakî şehîd bîyî. Nasnameyê embazanê ma bado ke bêrê zelalkerdene do rayapêroyîye rê reyde bêrê parekerdene.

5ê nîsane de zî bombardumanê vera warê Tepê Ortê yê herêma Metîna de  yew gerîla şehîd bi. Nasnameyê embazê ma yê şehîdî wana yo:

Nameyê Qodî: Mervan Gabar

Name û Peyname: Yunus Ozata

Cayê Bîyayîşî: Gogsî

Maye-Pî: Şerefnaz- Seyîd Batal

Tarîx û Cayê Şehadetî: 5ê Nîsana 2021 / Metîna

Embazê ma Mervan keyeyêko welatpewer ê Erziromî de ameyo dinya û bi ercanê şarê Serhadî bîyo pîl. Embazê ma Mervanî dima ke Têgêrayîşê Azadîye yê Kurdîstanî nêzdî ra nas kerd semedê pawitişê şar û erdê xo tewrê sefanê gerîlayan bi. Hemrayê ma Mervanî rêça îdeolojî û felsefeya Apoyîye de xo resna û bi gerîlayêko serekwte. Embazê ma Mervano ke bi vindertişê  xo yê qerardarî hetê embazanê ci ra sey nimûne ameyêne girewtene do tim rayîrê ma roşn bikero.

Ma sere de keyeyê erjîyayeyî yê şehîdê xo rê heme şarê welatperweryî yê Kurdîstanî rê serweşîye wazenê. Ma soz danê ke ma do waştîşê şehîdanê xo bîyarê ca.''

HGPyî da zanayene ke 6ê nîsane de saetanê cemê şanî de arazîya dewa yekmalê ya warê Bergarê yê herêma Garê pê teyarayanê şerî ameyî bombardumankerdene û vat nê hêrişan de vînîbyayeyê înan çîn ê.