Merkezê Îrtîbatî û Çapemenîye yê HPGyî derheqê şehîdanê Operasyonê Şorişgêrî yê Şehîd Helmet Dêrelukî de nê vatî:

''Ma eşkerayîya xo ya 14ê çeleyê 2023yî de eşkera kerdbi ke hemrayê ma Serxwebûn û Rizgar Operasyonê Şorişgêrî yê Şehîd Helmet Dêrelukî şehîd bîyî. Wird hemrayanê ma Serxwebûn û Rizgarî tarîxê têkoşînê ma de bi afirnayîşê serkewtişan nameyê xo nuşt û derbeyê girdî dayî artêşa îşxalkere ro. Keyeyê hemrayanê ma Serxwebûn  Rizgarî û şarê ma yo welatperwer heqdar ê ke pê şehîdanê xo yê qehremanan sereberz bê. Çunke înan semedê azadîya şarê xo bi hewayêkê fedakarî şer kerd û  qehremankî bîyî şehîd û bîyî çimeyê sereberzkerdişî yê şarê ma. Ma zî sey hemrayanê înan sere de keyeyanê hemrayanê xo Serxwebûn û Rizgarî û şarê xo yê welatperwerî rê serweşîye wazenê. Ma soz danê ke ma do xeyalanê şehîdan bîyarê ca.

Nasnameyê hemrayanê ma yê şehîdan wina yê:

Nameyê Qodî: Serxwebûn Serhed Name û Peyname: Sefa Altunay Cayê Bîyayîşî: Agirî Maye-Pî: Mecbure – Mehmet Ali Tarîx û Cayê Şehadetî: 12ê Çeleyê 2024î / Zap

 

Nameyê Qodî: Rizgar Çavreş Name û Peyname: Ronîcan Hemo Cayê Bîyayîşî: Kobanê Maye-Pî: Hamide – Osman Tarîx û Cayê Şehadetî: 12ê Çeleyê 2024î / Zap

 

Hemrayê ma Serxwebûn dewa Kosa ya Agirî de sey ferdê eşîrê Heyderanî yo ke eşîranê welatperweran ê herêma Serhedî ra yo, yeno dinya û bi kulturê welatperwerîye beno pîl. Senî ke lajanê Kor Hisên Paşayî tewrê Têkoşînê Agirî bîyî, tornê ci zî ewro mîyanê Têkoşînê Azadîye yê Kurdîstanî de têkoşîn kenê. Xalê hemrayê ma Serxwebûnî Şehîd Sîpan (Îlhamî Taşkin) şehîdo verên ê keyeyê Torunî yo. Dima ra nê keyeyê erjîyayî ra xeylêk kesî tewrê refanê têkoşînî bîyî.

Hemrayê ma Serxwebûn Agirî, Bursa û Anqara de mekteb wenano û xeylêk wext hesretê herra Kurdîstanî anceno. Gama ke Bedlîs de unîversîte waneno 2009 de dezayê ci Jêhat Serhat Mûş de şehîd beno. Naye ser o cigêrayîşê azadîye ci zafêr beno û 2014 de tewrê refanê Gerîlayanê Azadîye yê Kurdîstanî beno. Hemrayê ma Serxwebûn herêma Serhadî de tewrê refanê gerîlayan beno û şertanê zehmetan de perwerdeyê xo temam keno û Tendurek de pratîk rayra beno.

Dima ra verê xo dano Herêmanê Pawitişî yê Medya û Avaşîn de gerîlatîye keno.  2018 de ravîyareno warê Heftanînî. Tîya birîndar beno û semedê tedawî wextêk pratîkî ra kewno dûrî.  Kanûna 2020î de merdimê ci Jêhat (Sînan Serhat) netîceya komloyêkî de şehîd bi. Naye ser o waştişê qesasî yê hemrayê ma Serxwebûnî zafêr beno. Hemrayê ma Serxwebûn tewrê xeylêk çalakîyan û operasyonanê serkewteyan bi derbeyê pîlî dayî dişmenî ro.

Hemrayê Rizgar Kobanê de yeno dinya û bi kulturê welatperwerîye beno pîl û ciwanîya xo de xeyalanê domanîye xo ano ca û tewrê refanê gerîlayan beno. Hemrayê ma Rizgar seba ke cewabê hêrişanê dewleta tirke bido perwedeyê pîsporîya leşkerî geno. Verî perwedeyê suîkastî geno û beno pîsporêk. Reyna perwerdeyê çekanê giranan zî geno û beno gerîlayêko profesyonel.

Bado ke perwedeyê îdeolojîkî zî geno verê xo dano Herêma Zapî ya Şehîd Delîl Zagrosî. Tîya tewrê pratîkê zehmetî beno û heme wezîfeyanê xo bi serkewtiş ano ca. Xeylêk çalakîyanê serkewteyan de ca geno û seba ke çalakîyî ser bikewê bi hewayêkê fedakarî şino dişmenî ser.''