Merkezê Çapemenî û Îrtîbatî yê HPG’yî da zanayene ke gerîlayan Şirnex, Amed û Bedlîs de da eskeranê Tirkî ro xeylî eskerî ameyî kiştene.

Eşkerayîye de ca dîya nînan: ‘’ 30’ê Gulane de artêşa Tirkî herêma Findikî ya Gabarê Şirnexî de operasyon da destpêkerdene. Hêzanê ma çarçeweya Hemleya Qesasî ya Şehîde Medya Mawa û Şehîd Rizgar Geverî de da yewîyêka operasyonî ro. Çalakîya sûîqastî de eskerêk ame kiştene.

17’ê Gulane de artêşa Tirkî herêma  Çiravî ya Gabarî de dest bi operasyonêk kerd. Mabênê hêzanê ma û yewîyêka dişmenî de pêkewtiş vejîya, 4 eskerî û 2 kontrayî ameyî kiştene. Hîrê embazê ma yê ke bi şerkerdişêkê qehremankîyî derbeyî dayî dişmenî ro şehîd bîyî. Medyaya şerî ya taybete  ya artêşa Tirkî xebera zûre  rayapêroyî rê servîs kerde û da eşnawitene ke Rojbîn Gevere şehîd bîya. Embaza ma weş a û kare xo ser a. Wa şarê ma xeberanê zûran ê dewleta Tirkî ra bawer nêkero. Embazê ma yê ke şehîd bîyî, ma do nasnameyê înan pê ra eşkera bikerê.

28’ê Gulane de qezaya Licê ya Amedî de vera nuqtayaTêgêrayîşê Polîsanê Taybetî  (POH) hetê hêzanê ma ra çalakîyêk ameye viraştene qulubeyêk ame îmhakerdene û xeylî endamê POH’yî ameyî kiştene. Artêşa Tirkî dimayê çalakîye nuqtayê kontrolî caverdayî. Yewîya ma ya ke çalakîye viraşte weş resaye cayê xo.

24’ê Gulane de artêşa Tirkî herêma Gelîyê Keşanî ya qezaya Tetwanî ya Bedlîsî de operasyonêk da destpêkerdene. Hêzanê ma da yewîyêka operasyonî ro hûmara merde û birîndaranê dişmenê zelal nêbî. Dimayê çalakîye herême ameye bombardûmankerdene. Bombardûman de vîndîbîyayeyê ma çîn ê. Dewleta Tirkî bi xeberanê zûran vat vîndîbîyayeyê gerîla estê.

30’ê Gulane de teyareyanê şerî yê artêşa Tirkî Dola Çil û Çarî yê Xakurkê û derûdorê awa Zapî bombardûman kerdî. Nêtîceyê nê hêrişan de vîndîbîyayeyê ma çîn ê.’’