Merkezê Îrtîbatî û Çapemenîye yê HPGyî bi eşkerayîyêke nasnameyê di şehîdan eşkera kerdî. Eşkerayîye wina ya:

''Artêşa tirke ya îşxalkere hêrişê xo yê vera destkewteyanê şarê ma 24ê nîsana 2021î de bi operasyonê vera Avaşîn, Zap û Metîna resnayî astêka bîne. Dewleta tirke ya îşxalkere waşt ke Başûrê Kurdîstanî îşxal bikera, destkewteyanê şarê ma çin bikera coka PKKyo ke verê ney de asteng o, çin bikera. La planê înan bin kewt û artêşa îşxalkere raşta îradeyê Apogîran ameye. Gerîlayanê azadîye hewesê artêşa îşxalkere şikna û artêşa îşxalkere arde verê rijîyayîşî. Dewleta tirke ya ke pê xoverdayîşê gerîlayan nêeşkaye, tunelê şerî bi giranî dayî bombayan ver û vat qey do îradeyê gerîlayan bişikna. La artêşa îşxalkere reyna xelet vejîyaye û gerîlayan bi xoverdayîşê bêhempayî bi mengan rûmetê şarê ma pawit. Rixmê şertanê zoran zî embazanê ma xoverdayîşê xo yê destanwarîyî ra fek vera nêda û heta nefesê xo yê peyênî bîyî temsîlkarê azadîya şarê kurdî.

Embaz Adîl û Azadî tunelanê şerî yê Werxelê de ke bi mengan tede qehremanîyê pîlî qewimîyayê, xoverdayîşê destanwarî û tarîxîyî de cagirewt. Nê embazanê ma Cumalî Çavreyan reyde heman mewzîyan de şer kerd, rixmê hêrişanê kîmyewîyan tewirê xo yê milîtanîye ra fek vera nêda, xoverdayîş de israr kerd. Embaz Adil û Azadî şahîdîya şehadetê xeylêk embazanê xo kerde, nê şehadetî kerdî zemînê têkoşînî. Dişmenî 26ê êlula 2021î de hêrişê kîmyewî û teqayîşê pîlî kerdî û nê hêrişan de têkilîya ma ya bi embazan qerifîyaye. La dima qetî bi ke nê wird embazê ma zî şehîd bîye.

Nasnameyê embazanê ma yê şehîdan wina yê:

Nameyê Qodî: Adîl Qaşûrî Name û Peyname: Bayram Berk Cayê Bîyayîşî: Şirnex Maye-Pî: Sarya – Zekî Tarîx û Cayê Şehadetî: 26ê Êlula 2021î / Avaşîn

Nameyê Qodî: Azad Gerîla Name û Peyname: Xelîl Gedro Cayê Bîyayîşî: Heleb Maye-Pî: Şoreş – Muhammed Tarîx û Cayê Şehadetî: 26ê Êlula 2021î / Avaşîn

Embaz Adîl Botan de dadîya xo ra beno. Embaz Adîlo ke şahîdîya xeylêk qirkerdişanê dewlete bi, verî xebatanê ciwanan de cagêno û dima 2015 de Botanî ra verê xo dano koyanê azadan, beno gerîla.

Embaz Adîl perwerdeyanê verênan ra dima Şingal de vera cerganê DAÎŞî Şingal de şer keno û xeylêk hemle û çalakîyan de cagêno. Embaz Adîl serra 2018î de agêreno koyan û beşê weşîye de xo perwerde keno. Embaz Adîl ser xebatkarêkê weşîye verî Avaşîn de 3 serran kar keno û beno 'Doktor Adîl.' Embaz Adîl Avaşîn de tim vazdano hetkarîya embazanê xo û keno ke embazê ci binê tesîrê hêrişanê kîmyewîyan de nêmanê. Embaz Adîl qetî verê dişmenî de çok nêşino erdî ro. 26ê êlula 2021î de hêrişanê kîmyewîyan de embaz Adîl şehîd beno.

Embaz Azad mîyanê keyeyêkê efrînijî de Heleb de dadîya xo ra beno. Embaz Azado ke şahîdîya Şorişê Rojawanî keno, îşxalê Efrînî ra dima 2019 de verê xo dano koyanê azadan, beno gerîla.

Embaz Azad mîyanê gerîlayan de tim beno mazharê heskerdişê embazanê xo. Embaz Azad pêro erk û mesuldarîyanê xo bêkêmasî ano ca. O Avaşîn de embazanê xo reyde singe bi singe vera dişmenî şer keno. Embaz Azad sere de karanê binawanîye xeylêk xebatan de cagêno û viraştişê tunelan de beno kedkar. Embaz Azad Warê Xoverdayîşî yê Werxelê de vera hêrişanê dişmenî şer keno. Embaz Azad xeta fedayîtîye de şer keno û 26ê êlula 2021î de hêrişanê kîmyewîyan ê giranan û teqayîşanê pîlan de şehîd beno.

Ma sere de keyeyanê înan  ê ercîyayeyan rê pêro şarê welatperwerî yê Kurdîstanî rê serweşîye wazenê.''