Merkezê Îrtîbatî û Çapemenîye yê HPGyî nasnameyê di şehîdan eşkera kerdî. Eşkerayîye wina ya:

''4ê hezîrane de qezaya Elbakî ya Qanî de warê Masîroyî de hêrişê dişmenî de tîmêka ma ya gerîlayan darbe girewte. Embazê ma Serhildan û Fîraz nê hêrişî de birindar bîyî û seba ke nêkewê destê dişmenî bi fedayîtî şehîd bîyî. Rixmo ke fermandaranê nînan meylê teslîmîyetî kerdbî embazanê ma Fîraz û Serhildanî fedayîtîye tercîh kerde. Naye ra embazanê ma Fîraz û Serhildanî ruhê fedayîtîye yê nê çaxî temsîl kerd. 

Embazanê ma bi ganê xo mojna ke ganî tewir û xoverdayîşê milîtanîya fedayî ya Apogîre senî bêrê kerdene. Ma sere de keyeyanê nînan rê pêro şarê Kurdîstanî yê welatperwerî rê serweşîye wazenê. Ma verê vîrameyîşê embazanê xo de bi rêz û minetî sereyê xo anê war.

Nasnameyê embazanê ma yê şehîdan wina yê:

Embazê ma Serhildan şaristanê Merîwanî yê Rojhelatê Kurdîstanî de dadîya xo ra beno. Embaz Serhildan binê tesîrê şerê gerîlayan ê vera DAÎŞî de maneno û verê xo dano koyanê Kurdîstanî. O 2015 de Qendîlî ra tewrê gerîlayan beno û tîya de perwerde vîneno. Dima o derbazê Herêmanê Pawitişî yê Medya beno. O 2017 de zî perwerdeyê pisporîye gêno û waştişê xo ser o herêma Serhedî ya Vakurê Kurdîstanî de erk gêno. Embaz Serhildan Serhed de bi xurtî têkoşîn keno û bi fedayîtî şer kenıo. Ma soz danê ke armanc û xeyalanê ci bîyarê ca.

Embazê ma Fîraz mîyanê keyeyêkê pabesteyê eşîra Xelîlanî de Wan de dadîya xo ra beno. Embaz Fîraz xoverdayîşê Rojawanî yê vera DAÎŞî û xoverdayîşanê xoîdarekerdişî ra dima bi qerardarî 2016 de verê xo dano koyan. O perwerdeyê verênî ra dima verê xo dano Herêmanê Pawitişî yê Medya. O dima Qendîl de tewrê xebatanê partî beno. Embaz Fîraz perwerdeyanê îdeolojîkan ra dima zî verê xo dano Vakurê Kurdîstanî. Embaz Fîraz Serhed de vera hêrişanê dişmenî tim xeta Apogîre esas gêno û performansê milîtanîyêka serkewte mojneno.''