Merkezê Îrtîbatî û Çapemenîye yê HPGyî nasnameyê 5 gerîlayanê ke Werxelê de hêrişê bi çeka kîmyewîye de şehîd bîyê eşkera kerdî. Eşkerayîye wina ya:

''Ma eşkerayîya xo ya 9ê teşrîna verêne ya 2021î de dabi eşnawitene ke 5ê teşrîna verêne de artêşa tirke ya îşxalkere pê çekanê kîmyewîyan hêrişê tunelanê şerî yê warê xoverdayîşî yê Werxelê kerd û netîceya nê hêrişî de embazê ma Çavrê Kamuran, Dilvîne Dalaho, Amara Cûdî û Mahîr Kop şehîd bîyî.

Hêzanê ma çarçewa Hemleya Şorişgêre ya Bazanê Zagrosî de 23ê nîsane ra nata vera operasyonanê îşxalî 6 mengî yo destanê çêrî nuştî û cewab da dişmenê faşîstî. Nê operasyonê îşxalî de bi taybetî 7ê hezîrane ra nata waranê Werxelê û Girê Sorî yê herêma Avaşînî de têkoşîn û xoverdayîşê fedayî ameyî mojnayene. Hêzanê ma yê Girê Sorî û Werxelê nê wayî vurnayî waranê xoverdayîşî, vera îşxalkeran pêro taktîkî ardî ca û rayîr nêda îşxalî. Heman wextî de hêzanê ma derbê giranî dayî dişmenî ro û  dişmenî vînîbîyayîşê pîlî dayî. Hêzanê ma dest na xeylêk malzeme û teqaberanê dişmenî û warê xoverdayîşî yê Werxelê de verê îşxalkeran de bîyî sey kela. Îşxalkeranê ke pê tîmanê gerîlayan, mewzîyanê şerî û tunelan nêeşkayî pêro têknîkê xo şuxilna. Înan pê teyarayanê şerî û helîkopteranê hêrişî 4 mengan hêrişê giranî kerdî. Dima ke pê nînan netîce negirewte dişmenî helîkopterî û bi tonan teqaberê TNTyî ardî war û mewzîyî teqnayî. Embazanê ma bi çend reyan da îşxalkeranê ke waştêne aver şorê û hêrişê înan pûç kerdî.

Îşxalkeranê ke pê nê hêrişan nêeşkayî netîce bigêrê, muracatê çeka kîmyewîye kerd ke metodo tewr xirabîn ê merdimîye ya. Dewleta tirke bi zelalî qanûnê mîyanneteweyî binpay kerdî û sûc kerd. Nê sûcê dewleta tirke hetê gerîlayan ra pê dîmenan û dokumentan ameyî qeydkerdene û rayaumûmîye reyde ameyî parekerdene. Dima ke hêzanê ma nê hêrişê gazê kîmyewî zî şiknayî artêşa tirke ya faşîste bi taybetî menga peyêne de bi hawayêkê giranî pê bombayanê kîmyewîyan hêrişê embazanê ma kerd. Nê hêrişê bombayanê ke texrîbatê pîlî virazenê û pêro gandaran îmha kenê, netîceya înan de Werxelê de 5 embazê ma şehîd bîyî. Artêşa tirke ya tersnake pê metodanê namerdan û sûcanê vera merdimîye xo sey serkewte hesibnena la rêço tewr bêrûmetên ê tarîxî da rîyê xo rê. Mesuldarê nê kerdişê vera merdimîye sere de dewleta tirke hêzê mîyanneteweyê ke çekanê qedexeyan danê Tirkîya û ê kes ê ke vera nê hêrişan bêveng ê.

Nasnameyê embazanê ma yê şehîdan wina yo:

Nameyê Qodî: Cumalî Çorum Name û Peyname: Zeynel Erocagi Cayê Bîyayîşî: Çorum Maye-Pî: Mahsîme – Riza Tarîx û Cayê Şehadetî: 5ê Teşrîna Verêne ya 2021î / Avaşîn

Nameyê Qodî: Çavrê Kamuran Name û Peyname: Suheyla Kirmizitaş Cayê Bîyayîşî: Colemêrg Maye-Pî: Safîye – Celal Tarîx û Cayê Şehadetî: 5ê Teşrîna Verêne ya 2021î / Avaşîn

Nameyê Qodî: Dilvîne Dalaho Name û Peyname: Rêzane Deraferîn Cayê Bîyayîşî: Merîvan Maye-Pî: Necîme – Abdullah Tarîx û Cayê Şehadetî: 5ê Teşrîna Verêne ya 2021î / Avaşîn

Nameyê Qodî: Amara Cûdî Name û Peyname: Rojîne Ramazan Cayê Bîyayîşî: Derîk Maye-Pî: Hukmîye – Muhammed Said Tarîx û Cayê Şehadetî: 5ê Teşrîna Verêne ya 2021î / Avaşîn

Nameyê Qodî: Mahîr Kop Name û Peyname: Çetîn Çelîk Cayê Bîyayîşî: Mûş Maye-Pî: Aytene – Rahmî Tarîx û Cayê Şehadetî: 5ê Teşrîna Verêne ya 2021î / Avaşîn

Embaz Cumalî Çorum de keyeyêkê şorişgêrî û elewî de dadîya xo ra bîyo. Embaz Cûmal wexto ke Îzmîr de lîse wendêne netîceya cigêrayîşan de bi şorişgêr. O pê hêrsê vera Qirkerdişê Madimakî yê 1993î tewrê kerdişanê şorişgêran bi. Ey serra 1995 de Rayberîye û PKK şinasnayî û 1997 de bi hawayêkê aktîfî tewrê xebatanê Şarê Azadî bi. 1999 de wextê Komployê Mîyanneteweyî de embaz Cumalî çalakîyanê xo ra semed erzîya zîndanî. Embaz Cumalî temmuza 2002î de tewrê gerîlayan bi û 2003 de zî ey mîyanê Hêzanê Taybetan ê HPGyî de ca girewt. Embaz Cumalîyî dima ke Qendîl, Behdînan û Xinêre de pratîk kerd derbazê Vakurî bi. Ey 2006 ra heta 2011î herêma Gabarî de, Eyaletê Mêrdînî de gerîlatîye kerde û dima ke birîndar bi Herêmanê Pawitişî yê Medya de tedawî bi.Tedawî ra dima embaz Cumalîyî akademî de seyfermandar wezîfe kerd û xeylêk embazê ma perwerde kerdî. Ey kerd ke Hêzê Taybetî aver şorê û tim embazanê xo reyde têkilîyêka samîmî û duruste viraşte. Embaz Cumalî 2018 de derbazê Eyaletê Avaşînî bi û sey Endamê Fermandarîya Eyaletê Avaşînî xeylêk çalakîyanê serkewteyan de rayberîye kerde. Ey nê çalakîyan de derbê giranî dayî dişmenî ro û bi tersê dişmenî. Embaz Cumalîyî rixmê metodanê gemarinan ê dişmenî tunelanê şerî yê Werxelê de qetî embazê xo têna nêverdayî. Embaz Cumalî pê bawerîya xo ya bi sosyalîzmî û kesayetê xo yê şorişgêrî bi roşnîya têkoşînê ma.

Embaze Çavrê Gever de dadîya xo ra bîya. A wextê pêkewtişanê giranan de 2008 de tewra gerîlayan bîya. Embaze Çavrê nê tewrbîyayîşî ra dima xo sey azade hîs kerd û cade cuya gerîlatîye musaye. Embaze Çavrê pê perwerdeyan xo aver berd. Aye Zagrosan ra heta Heftanînî, Botanî ra heta Rojawanî xeylêk cepheyan de şer kerd. Embaze Çavrê 2017 de derbazê Avaşînî bîye û xeylêk mesuldarî û wezîfeyî ardî ca. Bi nê hawayî a bîye fermandarêka marîfetîne ya YJA-Starî. A pê kesayet û milîtanîya xo tim embazanê xo rê bîye mîsal. Embaze Çavrê warê xoverdayîşî yê Werxelê de bêteredut têkoşîn kerd û bîye şehîd.

Embaze Dilvîne Rojhelatê Kurdîstanî de dadîya xo ra bîya. Embaze Dilvîne vera polîtîkaya qirkerdişî ya serê kurdan 2012 de tewra gerîlayan bîye. Embaze Dilvîne semedo ke dişmenî ra qesasê xo bigêra û biba gerîlayêka marîfetîne tim xîret kerd û waşt ke îdeolojîya azadîya cinîyan a Rayber Apoyî raşt fam bikera. Aye tim xo rê xeta fedayîye kerde esas û dima ke derbazê Avaşînî bîye na xete ser o têkoşîn kerd. Warê xoverdayîşî yê Werxelê de rixmê hêrişanê dişmenî rîyê aye ra huyayîş kêm nêbi û bi nê hawayî ver bi şehadetî şîye.

Embaze Amara Dêrîk de dadîya xo rabîye û  semedo ke xeyalê azadîye yê şarê xo bîyara ca 2013 de tewra gerîlayan bîye. Aye xîret kerd ke xeta PKK-PAJKî de biba gerîlayêka cinîye û peynîya nê xîretan de bîye fermandarêka kedkare. Aye destpêkê hêrişan 23ê nîsane ra dima tim sey fermandarêka raybere tewr vernîya têkoşînî de ca girewt û bîye rayberanê xoverdayîşê Werxelê ra yew. Aye pêro çalakîyanê Werxelê de ca girewt û embazanê xo rê bîye çimeyê moralî. Embaze Amara bi nê hawayî bîye sembola xoverdayîşê Werxelê û milîtanêka xurte ya felsefeya Rayber Apoyî. Embaze Amara sey temsîlkara ruhê xoverdayîşê cinîya kurde tim mîyanê têkoşînê ma de do biciwîya.

Embaz Mahîr Mûş de dadîya xo ra bîyo. Embaz Mahîr prosesê şerê 2015î de tewrê gerîlayan bi û bi nê hawayî cewab da îşxalê dişmenî. Embaz Mahîrî herêma Avaşînî de pê kesayetê xo yê zerrînizmî û kedkarî şinasîya û xeylêk çalakîyan de tewr vernî de ca girewt. Ey tim Xoverdayîşê Werxelê de bi çêrîyêka pîle şer kerd û qetî nêverda ke dişmen mewzîyan ra derbaz bibo. Embaz Mahîrî sey temsîlkarê çêrî yê felsefeya Rayber Apoyî tarîxê rûmetînî yê şarê ma de cayê xo girewt û bi paçeyêkê Destanê Werxelê. Embaz Mahîro ke Werxelê de şehîd bi heta peynî verê serfîrazîya ma do roşnî bikero.

Sere de keyeyanê ercîyayeyan ê embazanê ma rê ma pêro şarê welatperwerî yê Kurdîstanî rê û şaranê Tirkîya rê serweşîye wazenê. Ma soz danê ke artêşa tirke ya îşxalkere ra hesabê nê qirkerdişan bipersê û qesasê embazanê xo yê şehîdan bigêrê.''