Merkezê Îrtîbatî û Çapemenîye yê HPGyî bi eşkerayîyêke nasnameyê 5 şehîdanê 2017î eşkera kerdî.

Eşkerayîye wina ya:

''2017 ê serran ra yewe bîye ke vera têgêrayîşê şarê ma PKKyî hêrişê tewr giranî ameyî kerdene. 2017 de artêşa tirke ya qirkere pêro îmkanê xo seferber kerdî, pê destekê hêzanê hegemonîkan kerd ke gerîlayanê azadîye tasfîye bikera. Vera nê hêrişanê topyekûnan gerîlayanê azadîye bi îradeyê Apogîrî şer kerd û cewab da nê hêrişan. Gerîlayanê azadîye 2017 de zî bi îrade û qerardarî seba estbîyayîş û destkewteyanê şarê ma têkoşîn kerd û bêguman nê têkoşînê qerardarî de şehîdî zî ameyî dayene. Xêrê xîret û kedanê şehîdanê ma yê qehremanan ra dewleta tirke 2017 de nêeşkaye biresa armancê xo, eqsê ci derbê giranî werdî. Embazanê ma Zîlane, Piling, Dijqar, Zinar û Şervanî nê têkoşînê destanwarîyî rê serkêşîye kerd, vera hêrişanê dişmenî tewirêko milîtanî mojna û bi têkoşînê qehremanî şehîd bîyî. Sere de embazan Zîlane, Piling, Dijwar, Zinar û Şervanî rê ma pêro şehîdan rê soz danê ke seba ke bibê layîqê înan têkoşînê înan do hîna pîl bikerê.

Nasnameyê embazanê ma yê şehîdan wina yê:

Nameyê Qodî: Zîlane Dêrsîm Name û Peyname: Zîlane Aybar Cayê Bîyayîşî: Colemêrg Maye-Pî: Necmîye – Abdurrahman Tarîx û Cayê Şehadetî: 2017/Herêmê Pawitişî yê Medya

Nameyê Qodî: Piling Rustem Name û Peyname: Ahmet Kaya Cayê Bîyayîşî: Sêrt Maye-Pî: Emîne – Abdullah Tarîx û Cayê Şehadetî: 2017/Herêmê Pawitişî yê Medya

Nameyê Qodî: Dijwar Întîkam Name û Peyname: Îsa Arslan Cayê Bîyayîşî: Colemêrg Maye-Pî: Halîme – Nîhat Tarîx û Cayê Şehadetî: 2017/Herêmê Pawitişî yê Medya

Nameyê Qodî: Zinar Raperîn Name û Peyname: Ridvan Can Cayê Bîyayîşî: Şirnex Maye-Pî: Meryeme – Mehmet Tarîx û Cayê Şehadetî: 2017/Herêmê Pawitişî yê Medya

Nameyê Qodî: Şervan Azad Name û Peyname: Tekîn Demîrbaş Cayê Bîyayîşî: Mûş Maye-Pî: Pîraze – Zulfîkar Tarîx û Cayê Şehadetî: 2017/Herêmê Pawitişî yê Medya

Embaze Zîlane Colemêrg de dadîya xo ra bena. Embaze Zîlane 2013 de Zagrosan ra tewra gerîlayan bena û Avaşîn de perwerdeyê verênî gêna. Embaze Zîlane bi fedakarî û xîretî pêro xebatan de cagêna û bena milîtanêka YJA-Starî ya xurte. Embaze Zîlane bena yew Bêrîtane û xeta xo ya azadîya cinîyan têkoşînê xo de eşkera kena. A mîyanê Hêzanê Taybetan de tewirê xo yê fedayî resnena lewê tewr pîlî. Embaze Zîlane heta şehadetê xo bi tewirê xo yê fedayî, bi tewrbîyayîşê xo û bi serkêşîya xo tim rayîrê ma do roşnî bikera.

Embaz Piling Sêrt de dadîya xo ra beno la Mersîn de beno pîl. Embaz Piling verî tewrê xebatanê ciwanan beno xeylêk reyî yeno destbendkerdene. O 2011 de 6 mengan zîndan de maneno û 2012 de dima ke zîndanî ra vejîya tewrê gerîlayan beno. O Heftanîn û Metîna de gerîlatîya verêne keno. Embaz Piling Qendîlî ra dima derbazê Çerçalla beno. O xeylêk çalakîyan de serkêşîye keno û rêçê fermandaran de şino. Embaz Piling qetî tewirê xo rê tawiz nêdano û bi nê hawayî karwanê şehîdan beno. 

 

Embaz Dijwar Colemêrg de dadîya xo ra beno. Embaz Dijwar wexto ke 2014 de leşkerîya mecbûrî ya artêşa tirke kerdêne, vano 'bes o' û baregehê leşkeranê tirkan ê Mereşî ra Zagrosan de tewrê gerîlayan beno. Embaz Dijwar cografyaya çetine ya Zagrosan de bêteredut têkoşîn keno û xo hem warê leşkerî de hem zî warê hunerî de aver beno. O pêro erk û mesuldarîyanê xo bêkêmasî ano ca. Ma do sey embazanê ey tim vîrameyîşê embaz Dijwarî xo rê bikerê esas û qetî dişmenî ra qesasê şehîdan bigêrê.

Embaz Zinar Şirnex de dadîya xo ra beno. Embaz Zinar hêrişanê DAÎŞî ra dima bi hîsê hêrs û qesasî verê xo dano koyanê azadan. Embaz Zinar pê perwerdeyan bi felsefeya Rayber Apoyî xo aver beno û nê esasî ser o tim mîyanê xîretan de cagêno. Embaz Dijwar mîyanê Hêzanê Taybetan de cagêno û keno ke xeta şehîdan de têkoşînê xo hîna zaf aver bero. Embaz Zinar bi nê ruhê xo yê esîlî hema ciwanîya xo de kedanê pîlan dano. Ma soz danê ke têkoşînê ey bi serkewtişî tacîdar bikerê.

Embaz Şervan qezaya Milazgîrî ya Mûşî de dadîya xo ra beno. Embaz Şervan 2016 de verê xo dano koyanê azadan. O Garê de perwerdeyê xo yê verênî gêno. Embaz Şervan pê coş û kelecanê xo cade adapteyê gerîlatîye beno. O mîyanê Hêzanê Taybetan de zî cagêno û beno fermandarêko serkêş. Embaz Şervan cuya xo ya gerîlatîye de qetî têkoşînî ra teredut nêkeno û beno temsîlkarê xeta şehîdan. Embaz Şervan bi tewrbîyayîşê xo mîyanê şehîdanê qehreman de cagêno û beno parçeyêko rûmetên ê tarîxê PKKyî.

Ma sere de keyeyanê şehîdan ê ercîyayeyan rê pêro şarê welatperwerî yê Kurdîstanî rê serweşîye wazenê.''