Merkezê Îrtîbatî û Çapemenîye yê HPGyî nasnameyê gerîlayanê ke Zînî Wertê de şehîd bîyî eşkera kerdî û nê pare kerdî:

''Ma eşkerayîya xo ya 16ê nîsana 2020î de dabi eşnawitene ke 15ê nîsane de hêrişê dewleta tirke ya îşxalkere yê vera herêma Qendîlî ya Herêmanê Pawitişî yê Medya de 3 embazê ma şehîd bîyî. Embazê ma yê ke şehîd bîyî zanayîşê nasnameyanê înan wina yê.

Nameyê Qodî: Xeyrî Garzan Name û Peyname: Tekmîl Dalmiş Cayê Bîyayîşî: Feryaze – Salih Maye-Pî: Êlih Tarîx û Cayê Şehadetî: 15ê Nîsane 2020î / Qendîl

Nameyê Qodî: Agirî Qendîl Name û Peyname: Hekîm Xuncahan Cayê Bîyayîşî: Merîvan Maye-Pî: Zeynepe – Selîm Tarîx û Cayê Şehadetî: 15ê Nîsane 2020î / Qendîl

Nameyê Qodî: Sîpan Şahîn Name û Peyname: Xebat Casim Cayê Bîyayîşî: Serêkaniyê Maye-Pî: Findiqe - Casim Tarîx û Cayê Şehadetî: 15ê Nîsane 2020î / Qendîll

Hemra Xeyrî fermandarêko rayber bi

Hemra Xeyrî serra 1976î de Hezoyê Êlih de sey domanêkê keyeyê welatperwerî ameyo dinya. Raştîya dişmenî hema domantîya xo de nas kerda. Gama ke hîsê ci yê welatperwerîye û zanayîşê ci yê şorişgerîyê xorî  bîyî  tewrê Têkoşînê Azadîye bîyo. Hemra Xeyrîyo ke xeylêk waranê Hêrmanê Pawitişî yê Medya xebatan de aktîf ca girewt rayîrê heqîqetî de bi qerardarîye aver şîyo û heme wezîfeyê xo bi serkewtiş ardî ca. Hemra Xeyrî fermandarêko rayber bi ke problemî çareser kerdêne. Hemra Xeryî yo ke hetê embazanê xo ra zaf ameyêne sînayene do bi têkoşînê xo yê cuye dekerdeyî her wext rayîr bimejno ma û şorişê ma rê roşnayî bo.

Hemra Agirî embazêko fedaî bi

Hemra Agirî bajarê Merîvanî yê Rojhelatê Kurdîstanî de ameyo dinya û keyeyêko welatperwer de bîyo pîl. Hemra Agirî yo ke  serranê xo yê ciwanîye de  Têkoşînê Azadîye nas kerd 2017î de tewrê sefanê gerîlayan bîyo. Hemra Agirî yo ke xeylêk waran de xebatî rayra berdî her ca de bi kesîya xo ya fedaî vejîyayo vernî. Hemra Agirî heme wezîfeyê xo bi berpirsîyara girde ardî ca û heta şehadetê xo helêke zî nêvindert, semedê azadîya şarê xo têkoşîn kerd û tewrê kerwanê şehîdan bi.

Hemra Sîpanî rêçê xorîyî verdayî

Hemra Sîpan serra 1992yî de  bajarê Serêkanîye yê Rojawanê Kurdîstanî de ame dinya. Serranê xo yê ciwanîye de têkoşîn nas kerd û xebatê komelkî rayra berdî. Hemra  Sîpan  vera qirkerdişanê dişmenî yê vera kurdan têkoşîno xo gamêke aver berde û serra 2012yî de  tewrê sefanê gerîlayan bîyo. Hela tewrbîyayîşî ra heta şehdatê xo bi zanayîşê gird xabatan de aktîf ca girewt û tim vernîya cepheyî de têkoşîn kerdêne. Hemra Sîpano ke Rayberîye rê zaf girêdaye bi zerîya embazanê xo de rêçê xorîyî verdayî.

Sere de keyeyê hemrayanê ma yê şehîdan wa sereyê heme şarê welatperwerî yê Kurdîstanî weş bo. Ma soz danê ke ma do beyraqa têkoşînî ya ke şehîdanê ma kiriştêne ma biresnê sirpilikî.''