HPG-BÎMî îzehetêk da û îzehetê xo de aşkere kerdo ke hêzê gerîlayan qezayanê Çelê û Şemzînanî yê Colemêrgî de vera hêzanê dewleta tirkî çalakîyê tesîrinî viraştî.

HPG-BÎMî dayo zanayene ke Çelê de mewzîyêkê leşkeran ameyo îmha kerdene û netîceyê ci de 4 leşkerî ameyî kiştene, Şemzînan de 4 mewzîyî û Cizîr de zî wesayîtêko zirxin ameyî îmha kerdene. Goreyê îzehetî, artêşa tirkî bi teyarayan hêrişê xeylê nuqtayanê Warê Pawitişê Medya kerdî.

ÇELÊ DE ÇALAKÎYE: 4 KESÎ MERDÎ

HPG-BÎMî dewamê îzehetê xo de ca dayo melumatanê winasîyan: “Hêzê ma çarçewaya Hemleya Şorişgêrî ya Şehîd Pîroz û Şehîd Agirî de vera artêşa tirkî ya dagîrkere de çalakîyî viraştî. Goreyê ci 8ê êlule de hêzê ma vera leşkerê ke Girê Koordîne de bica bîybî de çalakîyêk viraşto. Netîceyê çalakîye de mewzîyêk ameyo îmha kerdene û 4 leşkerî ameyî kiştene. Reyna hêzanê ma 9ê êlule de saete 15.30î de vera leşkerê ke Gira Şikerê Sipî ya Şemzînanî de bica bîybî de çalakîyêk viraşto. Netîceyê çalakîye de 4 mewzîyî ameyî îmha kerdene, labelê hûmara merde û birîndaran nêameya zelal kerdene. Çalakîye ra dima hêzê dagîrkerî dorme bi obus û topan bombe kerdî.”

CIZÎR DE WESAYÎTO ZIRXIN ÎMHA BI

HPG-BÎMî qala çalakîya gerîlayan ya Cizîrî zî kerdo û wina vato: “Hêzê ma 8ê êlule de vera 2 wesayîtê zirxinî ke dewê Hesena û Daderî yê qezaya Cizîrî ya Şirnexî de gêrayênê de çalakîyêk viraşta. Netîceyê çalakîye de wesayîtan ra yew bi temamî ameyo îmha kerdene, labelê hûmara merde û birîndaran nêameya zelal kerdene.”

HPG-BÎMî îzehetê xo de ca dayo hêrişê dewleta tirkî yê vera Warê Pawitişê Medya û wina vato: “Teyarayê dewleta tirkî 8ê êlule de warê Mervanisî yê Zapî û 9ê êlule de Girê Hakkarî yê ke girêdayeyê herêma Metîna bombe kerdî. Xeberê ke medyaya tirkan de vejîyenî û îdîa kenî ke 35 gerîlayî merdî, bi temamî zurî yî. Colemêrg û Amed de pêro pîya 5 gerîlayî şehîd kewtî.”

YEW HEWTE DE 59 LEŞKERÎ KIŞÎYAYÎ

HPG-BÎMî peynîya îzehetê xo de vato ‘pêro pîya 5 embazê ma şehîd kewtî û ma melumatanê înan raya pêroyî reyde pare kerd’ û wina qedênayo: “Mîyanê yew hewteyî de 22 çalakîyî ameyî viraştene û netîceyê çalakîyan de 59 leşkerî kişîyayî, 3 wesayîtê zirxinî îmha bîyî û netîceyê 10 çalakîyan zî nêameyo zelal kerdene. Artêşa tirkî xeberanê zuran peşkeş kena û hewl dana şarî bixapêna. Artêşa ke nêşêna vera gerîlayan de şer bikera, hewa ra daristananê Kurdistanî bombe kena. Wa raya pêroyî baş bizano ke çîyê ke dewleta tirkî û artêşa ci vanî, zurî yî û seba nimitişê binkewtişê hêzanê xo yenî vatene.”