Merkezê Îrtîbatî û Çapemenîye yê HPGyî bi eşkerayîyêke çar gerîlayê ke 2019 de Serhed de şehîd bîyê yad kerdî.

Eşkerayîye wina ya:

''Hêzanê ma yê gerîlayan ê Serhedî serranê peyênan de pê çalakîyanê xo derbê giranî dayî artêşa tirke ya îşxalkere ro û seke dişmen felç kerd. Dewleta tirke ya kolonyalîste seba ke nê tesîrê embazanê ma bişikna û Serhed de gerîlayan tasfîye bikera hêrişê giranî kerdî. Nê hêrişanê 2019î de embazanê ma Bager, Mazlûm, Harun û Agîtî bi çêrî şer kerd û şehîd bîyî. Nê embazanê ma tewirê xo yo Apogîr şer de zî mojna, qetî tawîz nêda dişmenî. Ma reyna soz danê ke wezîfeyê şorişî yo ke nê embazan dewrê ma kerdo qetî bîyarê ca.

Nasnameyê embazanê ma yê şehîdan wina yê:

Embazê ma Bager Wan de dadîya xo ra bîyo. Embaz Bagerî wextê zanîngehî de xebatan de ca girewt û 2009 de bire daye ke verê xo bido koyan. Embaz Bagerî perwerdeyan ra dima felsefeya Rayber Apoyî hîna hol fam kerde û bi nê hawayî bi milîtanêko serkewte. Embaz Bagerî sere de Xakûrkê xeylêk waranê Başûrê Kurdîstanî de gerîlatîye kerd û 2015 de derbazê Serhedî bi. Embaz Bager perwerdeyan ra dima zî bi fermandarêko marîfetin ê gerîlayan.

Embaz Mazlûm Wan de dadîya xo ra bîyo. Embaz Mazlûmî hema ciwanîya xo de xebatanê têkoşînî de ca girewt û 2012 de zî tewrê gerîlayanê azadîye bi. Embaz Mazlûmî xeylêk cayanê Kurdîstanî de gerîlatîye kerde û tim xîret kerd ke wezîfeyanê xo bêkêmasî bîyaro ca. Embaz Mazlûmo ke pê kesayetê xo bi mazharê heskerdişê embazanê xo 2015 de sey fermandarêkî derbazê Eyaletê Serhedî bi û vera dişmenî bi hêrsî şer kerd. Vîrameyîşê ey do tim rayberîya ma bikerê.

Embaz Harun Agirî de dadîya xo ra bîyo. Embaz Harunî verî xebatanê ciwanan de ca girewt dima zî 2015 de Xoverdayîşê Xoîdarekerdişî yê Sûrî de têkoşîn kerd. Embaz Harunî nê xoverdayîşî ra dima verê xo da koyan. Embaz Harun waştişê xo ser o derbazê Eyaletê Serhedî bi û tim xîret kerd ke mesuldarîyanê xo bîyaro ca. Embaz Harun pê kesayetê xo yê duristî, zerrînizmî mazharê hûrmet û heskerdişê embazanê xo bi. O do tim mîyanê têkoşînê ma de biciwîyo.

Embaz Agîr qezaya Hênî ya Amedî de dadîya xo ra bîyo. Embaz Agîtî vera hêrişanê dişmenî serra 2015î de Eyaletê Serhedî de tewrê gerîlayan bi û perwerdeyê verênî tîya de girewtî. Embaz Agîtî 2016-2017 de hêrişanê dişmenî de rayberîya çalakîyan kerde û derbê pîlî dayî dişmenî ro. Embaz Agît pê tewirê xo yê fermandarîye waşt ke bibo layîqê şehîdan û Rayber Apoyî, ey tim seba nê armancî şer kerd.

Ma sere de keyeyanê ercîyayeyan ê embazanê xo rê, pêro şarê welatperwerî yê Kurdîstanî rê serweşîye wazenê.''