Hemşaredara Colemêrgî Humeyra Armuta ke herinda ci de qeyûm amebi tayînkerdene derheqê rewş û tedayanê vera cinîyan de ANFyî rê qisey kerd.

Colemêrg de qeyûmî û dewlete tewr zaf dewtkewteyanê cinîyan kenê hedef. Şaredarîya Colemêrgî 2015î de Merkezê Cinîyan ê Binveşe akerdbi. Qeyûmî dima qefilna, Mudirîya Keyeyan û Kulturî awan kerd û camêrdêk sey serekî wezîfe kerd. Merkezê Şêwirmendîye yê Cinîyan ê Binevşe zî da polîsanê têgêrayîşê taybetî.

Armute da zanayene ke herême de vera cinîyan polîtîkayê taybetî yenê kerdene û vat: ''Verê cinîyan danê fuhuş û kondoxî. Merkezê cinîyan meseleyanê cinîyan rê bîyêne cewab la qefilîyayî. Cinîyî sey hêzê erjanî yê kede dîyenê. Cinîyê sîyasetmedarî yenê destbendkerdene, raştê dewayan yenê. Qeyûmî verî sîstemê hemserekîye kerd hedef.

Qeyûmî Merkezê Cinîyan ê Binevşe qefilna û dezgehanê cinîyan de camêrdî wezîfedar kerdî. Ma waşt reyna warê cinîyan abikerê la qeyûmî no asteng kerd. Ma sey cinîyan key bêrê pêser cinîyî hesreta xo ya bi wextê verênî anê ziwan.''

Armute eşkera kerd ke polîtîkayê HDPyî yê semedê cinîyan zelal ê û vat: ''Cinîyî coka pê HDPyî hêvîdar ê. Colemêrg de nufusê cinîyan ê ciwanan zêde yo. Derheqê prosesanê komelkîyan de tedayî zaf ê. Vera nînan ma do cewabê tewr pîlî bidê.''