Alozîya Zînî Wertê ya ke pê Zînî Wertê de cakerdişê hêzanê PDKyî û şehîdbîyayîşê 3 gerîlayan dest pêkerd şarê kurdî qerqilnena.

Platformê Hunermendanê Kurdîstanî yo ke serra 2000î de hetê hunermendan ra seba ke paştî bido yewîya neteweyîye ronîya pê derheqê babete de eşkerayîyêke daye. Hunermendan eşkerayîya xo de vist vîrî ke dewleta tirke seba ke destkewteyanê kurdan çin bikerê her hetî ra hêrişê kurdan kena û na babete zaf girîng vînena. Hunermendan îfade kerd ke semedo ke yewîya kurdan nêamey caardene Efrîn, Girê Sipî, Serêkanîyê û herêmê Başûrê Kurdîstanî ameyî îşxalkerdene. 

Eşkerayîeye de ame vatene: ''Dewleta tirke û Îran alozîya mabênê kurdan seba menfaatanê xo asta stratejîke de girîng vînenê. Alozîya ke Başûrê Kurdîstanî de qewimîyena şarê ma qerqilnena. Ma zî sey hunermendanê kurdan zaf qerqilîyenê ke gelo reyna birakûjî-kiştişê birayan do bêro meydan yan ney. Ma ke seba caardişê yewîya neteweyîye 6 mengî verê ameyî pêser reyna anê ziwan ke hewceyê ma pê yewîya neteweyîye esto.''

Hunermendan hêrişê dewleta tirke yê vera Mexmûrî zî şermezar kerd. Platformê hunermendan seba çareserîya alozîya Zînî Wertê venga PDK, YNK, PKK, Hukmatê Herêma Kurdîstanî, selahîyetdaran û dezgehan da ke esasê menfaatanê yewîya neteweyîye ser o têbigêrê û mesele pê dîyalogan çareser bikerê.