Komîteya Ekolojî ya KCKyî ra Bahoz Jîyarî ANFyî derheqê newe ra înşakerdişê bajaranê erdlerzî de qisey kerd.

Bahoz Jîyarî vat: ''Na cografya de gerek kombanî nêrê viraştene. Ne goreyê kulturê şarî zî nîyê.  Eleqeya kombanan û bi şarê herême çîn a. Pê TOKÎ kenê ke komelî komelbîyayîşî ra raqlinê û talanî bidê domnayene. Ma caardişê înan Sûrî ra zanê. Gerek banî goreyê tarîx, kultur û bawerîya şarî bêrê viraştene. Kurdî bajaran de biciwîyê zî yew linga înan tim dewan de ya, pabesteyê xoza yê.

Rixmê felaketa girde wayîrvejîyayîşê na cografya muhîm o. Şar nêwazeno erdê xo caverdo. Ma pê bawerê ke şarê ma do destê yewbînî bîgêro, binê nê rijnayîşê dewlete ra bivejîyo û cuya xo newe ra înşa bikero. No zî bi paştîdayîşî beno. Kampanyaya 'keyeyê wayûbiratîye' kampanyayêka muhîm a.

 Xopawitiş xora tam wextanê winayênan de hewce keno. Xayînê ke semedê rantî şarê xo roşenê, gerek vera înan çarçeweya xopawitişî de têkoşîn bêro rayraberdene. Ma zanê îtîfaqo faşîst ê AKP-MHPyî na felakete sey 'lutfê Homayî' vîneno. Keno ke heme avantajanê îqtîdarî bişuxulno û şarê ma herra ci raqilno. Sere de Bazarcix, Elbîstan, Semsûr, Meletî û Hatay de şarê ma elewî reyde gerek torrê paştîdayîşî yê xurtî bêrê ronayene ke barîkatê tewr girdî yê xopawitişî bêrê ronayene.

Xora polîtîkayê îqtîdarê faşîstî yê ke xeta Mereş, Semsûr, Meletî û Hatay de yenê rayraberdene, polîtîkayê qirkerdişî yê. Yeno vatene ke  hema nika ra 4 mîlyonî ra zafêr kesan koç kerdo. Eke meslîsê bajarî merê ronayene û şarî reyde tekîlî mero ronayene rewşe xirabêr bena. Bitaybetî domanê ke teslîmê tarîqatan bîyî do ameyox de bibê kontragerîla. Gerek meclîsê bajaran destûr medê ke qet domanêk qoqê ci ra bêro raqilnayene.

Seba ke şar hêrişê rantî ra bêro xelisnayene  gerek kampanyayê agêrayîşê dewan bêrê destpêkerdene. Xora agêrayîşê dewe, xoza hedefê xelisnayîşê merdimîye yo. Meclîsê Bajarî eşkenê bi komun û kooperatîfan semedê her kesî warê cuye azade înşa bikerê ke no do bibo averşîyayîşo zaf muhîm û şorişkî. Xora şarê herême zî naye rê hazir o. Nê warî de heme erjê komunkî ganî yê. Derûdorê deştanê Îslahîye û Samsatî komelê medenîyeteyê demokratîkî eşkeno newe ro bêro afirnayene.

Seba ke afate mebo felaket tedbîrê ke gerek bêrê girewtene est ê. Herinda nê tedbîran de verê felaketan yeno akerdene. Seba ke hetê sîyasî, eskerî, ekonomî ra rant bifînê dest, texrîbatê afatan wina gird benê. Coka îqtîdarê ke rantî ser o xo înşa kerdo xora çimeyê rantî wişk nêkenê. Gerek şar bi yewbîyayîş û paştîdayîşî warê cuye newî biafirno.''