Endamê Komîteya Rayberdişî ya PKKyî Duran Kalkanî ANFyî reyde qisey kerd û rojdem ercna.

Kalkanî vat: ''Pê pêvînayîşê 3ê adare tecrîd nêame qedînayene. Sîstemê tecrîdî û îşkenceyê Îmraliyî dewam keno. Demokrasî seba Tirkîya sey awe û nan lazim o. Eke Tirkîya de demokrasî nêro awankerdene ne aramî do biba ne zî komel do bieşko biciwîyo. Rayber Apo qala lingê hîrêyînî kerde, no ling lingo demokratîk o. Rayber Apo ney bi vatişê 'çareserîya dewlete û demokrasîyî' pênase keno. Qastê ci zî xoserîya demokratîke, konfederalîmo demokratîk ê. Hêzo bingeyî yê nê demokrasîyî kurd ê. Lingo hîrêyîn kurd û hêzê demokratîkî yê.

Gerîlayan Rojhelato Mîyanên aver berd, têkoşînêko bêhempa mojna. Kurdî çendek yew bibê hende hêzê têkoşînî beno zêdêr. Serdestê emperyalîstî sîyasetê 'parçe bikerê, bidê şerkerdene, îdare bikerê' anê ca. Paştî danê terefêkê kurdan. Bi nê hawayî wazenê ke PKK qels bikerê. No zî verê serkewtişê têkoşînî gêno. Bi rayîrê şerê zereyî, ajanîye û bêbextîye xîret kenê ke têkoşînê azadîye qels bikerê. Rojhelatê Mîyanênî de zî na rewşe esta.

PKKyî pê hêzê xo têkoşîn kerd û no dî: No têkoşîn heta astêke do dewam bikero labelê seba ke netîce bêra girewtene ganî yewîye bêra awankerdene. Wexto ke yewîye nêra caardene hêzê xerîbî PKKyî rê benê asteng. Rojhelato Mîyanên nêeşkeno bi hêzê xo têkoşîn bikero, ganî o şaranê bînan reyde yew bibo, têkoşînêkê hemparî bikero. Ganî kurdî bibê yew, ganê şarê Rojhelatê Mîyanênî bibê yew. Ganî nê têkoşînêkê hemparî bikerê. Merdim eşkeno têna têkoşîn bikero la nêeşkeno têna ser bikewo. Demokrasî, wayûbiratîye, yewîya demokratîke bêyewîye nêbenê. Şorişê Rojawanî kurdî kerdî yew, yewîya neteweyîye arde ca.

Rojawan de kurdî, erebî,sûryanî, tirkmenî, çerkezî, armenîyî yewîya demokraîke ra Konfederalîzê Demokratîkî awan kenê. Rojawan verê yewîya Rojhelatê Mîyanênî akeno. Eke Rojawan ver bi çareserîyêka serkewte şoro kurdî do azad bibê, Sûrîye do biba wayîra yewîya demokratîke, îtîfaqê kurd-erban do bêro caardene, yewîye û wayûbiratîya demokratîke ya şaranê Rojhelatê Mîyanênî do bêra caardene. Coka têkoşînê Rojawanî fîraz o.

Dewleta tirke nêwazena kurdî bibê wayîrê heqêkî. A dişmena Esadî, DYA yan zî Rûsya nîya. Têna dişmenîya kurdan kena. Erdogan ge vazdeno şino verê Amerîka ge şino verê Rûsya û Ewropa. Xîret keno ke hîşmendîya xo ya dişmenîya kurdan ra fayde bivîno. DYA, Rûsya, Ewropa do çita bidê Tirkîya? Çîyêk nêdanê, ci ra gênê. Seke manga doşenê Tirkîya doşenê.

Rayber Apoyî çareserîye mîyanê Tirkîya de dîye. Ey çareserîya yewîya demokratîke ya meseleya kurde bingeyê xoserîya demokratîke de îfade kerde û waşt ke bivisno pratîk. Rayber Apo vano ke heman çareserîya Sûrîye de zî eşkena bêra caardene. No zaf girîng û manadar o. Çareserîye pê demokratîkbîyayîşê Sûrîye, pê tesdîqkerdişê heqan ê demokratîkan ê şarê kurdî bena. Eke demokratîkbîyayîş çinbo yewîye zî nêbeno.''