Endamê Komîteya Rayberdişî ya PKKyî Duran Kalkanî bi wesîleya serrgêra 21. ya Komployê Mîyanneteweyî yê 15ê Sibate ke şexsê Rayberê Şarê Kurdî Abdullah Ocalanî de vera şarê kurdî ame kerdene ANF reyde qisey kerd.

Qiseykeridişê Kalkanî ra beşêk wina yo: ''Komployo mîyanneteweyî her çi ra ver hetê DYA ra bi îmzaya DYA ya ê wextî Clîntonî ame kerdene.Îngîlîstan û Îsraîlî zî o çax paştî da DYA. Komplogeran bi metod û rayîran xîret kerd ke Rayberê Şerê Kurdî Abdullah Ocalanî îmha bikerê û sey rewşêka bêkifşe bimojnê. Dima ke no ame pûçkerdene bi sîstemê tecrîdî û îşkenceyî waşt ke Rayber Apo hetê îdeolojîk û sîyasî ra çin bikerê. No hêriş zî ame şikitene û o çax îqtîdarê Erdoganî/AKPyî ame wezîfedarkerdene. Nê îqtîdarî waşt ke PKK parçe bikerê. Bi nê hawayî bi 15 serran o şerê taybetî yê vera kurdan dewam keno.

Ma zanenê ke stratejîya komployê mîyanneteweyî bi nê hawayî ame viraştene: Bi îmhakerdişê Rayber Apoyî PKKyî tasfîye bikerê, bi tasfîyekerdişê PKKyî zî qirkerdişê kurdan ê se serran dewam bikerê. Yanî no qirkerdişê şarê kurdî yo. Komployo mîyanneteweyî vegirewtişê çareserîya meseleya kurdan o, seba astengkerdişê çareserîya sîyasî û demokratîke ya meseleya kurdan xîretêk o.

Şerê Dinya yê 3. bi şerê Kendavî dest pêkerd û serranê 90an de dewam kerd ke dima derbazê safhaya bîne bi ke Rojhelatê Mîyanênî ser o teda û asîmîlasyonê pîlî zî bi nê hawayî dest pêkerd. Tersayêne ke eke Saddam bêro rijnayene PKK hêzanê xo Rojhelatê Mîyanênî de vila bikero û her parçeyê Kurdîstanî de şoriş bikero. Coka rijnayîşê Saddamî zî bi komployê mîyanneteweyî dest pêkerd. DYA zanayêne ke estbîyayîşêko pîl ê PKKyî esto, Rayber Apo têkoşîn keno. Coka plan kerd ke Têgêrayîşê Azadîye yê Kurdîstanî, Rayberê ci bêtesîr bikerê, dima dest pê Iraqî û herêmanê bînan bikerê. Xora Komployê Mîyanneteweyî yê 15ê Sibate bingeyê bazarîyêka winasêne dest pêkerd.

21 serr ê ke bi rayberîya Rayberê Şarê Kurdî Abdullah Ocalanî têkoşînêko pîl yeno kerdene. îradeyê nê têkoşînî Rayber Apo yo. Êyê ke vera nê şerî, komployan, îşkenceyan, metodanê gemarinan têkoşîn û xoverdayîş kenê fikrê Rayber Apoyî yê. Înan waşt ke rojêke de Rayber Apo îmha bikerê la ser nêkewtî. PKK bi hawayêkê xurtî payan ser o yo û rayberîya têkoşînê azadîye yê kurdan keno. Nê têkoşînî sînoranê Kurdîstanî ra derbaz kerd bi global. Nê pêro astêka girînge ya averşîyayîş ê.

Her ke planêk ame pûçkerdene planê neweyî ameyî amadekerdene. Bi nê hawayî hêrişê komplogeran ê seba çinkerdişê şarê kurdî dewam kenê. Rayber Apoyî vat: 'Eke PKK mîyanê şeş mengan de bi hawayêkê rastî têkoşîn bikero, vera ci hêzêk çin o ke çin bibo.' Belê armanc û planê komployî ameyî qelskerdene, ameyî pûçkerdene labelê eşkera yo ke komplo bi temamî nêame çinkerdene. No zî kêmasîya têkoşînê ma yo.

Nê esasî ser o ganî ma serrgêra Komployê Mîyanneteweyî yê 15ê Sibate de rastîya komployî ser o baş vinderê, bi hawayê rexnekerdişî-rexnedayîşî xeta Rayberîye û Şehîdan ra dersan bigêrê û vera komployî têkoşînêkê bitesîr bikerê, ser bikewê.No wezîfeyo bingeyî yê têgêrayîşê ma, embazanê ma û şarê ma yê welatperwerî yo.''