Endamê Komîteya Rayberdişî ya PKKyî Duran Kalkanî bi wesîleya serrgêra ronîyayîşê PKKyî ANFyî rê qisey kerd.  Qismê diyînî yê roportajê Kalkanî rê tay beşê girîngî wina yê:

''Çeka tewr pîle ya PKKyî perwerde bi. PKKyî destpêkî ra nata metodê propaganda şuxilna. Dima perwerdeyê têkoşînê çekdarî dest pêkerd. Propaganda ra dima PKKyî dest eşt çapamenîye. Kovara ma ya verêne Serxwebûn a ke 4-6ê êlule de hûmara ci ya verêne Amed, Xarpêt û Çewlîgî de bi hawayêkê îlegalî weşanîyaye. 1982 de Serxwebûn hînî Ewropa de weşanîya û ewro zî dewam keno. 1995 ra dima weşanê televîzyon û radyoyî dîyayî destpêkerdene. Karê çapemenîya ma no yo ke raştîyan eşkera bikero, zûranê medyaya şerê taybetî ya dewleta tirke vejo werte. Reyna karê çapemenîya ma yo ke komelî perwerde û agahdar bikero. Medya û çapemenîye ma de nika warê têkoşînî yo tewr girîng o.

PKKyî nê 50 serran de komelêko newe vet werte. PKK ciwananê ke tewrê gerîlayan benê hêverî binî ra perwerde keno. Vera ciwananê Kurdîstanî hêrişê dişmenî giran ê, şerê taybetî ra zî wetêr ê. Îqtîdarê AKP-MHPyî mîyanê ciwanan de qestî ra madeyanê tîryakî vila keno. Hetê bînî rê tay ciwanî est ê ke Apogîr ê. Rayber Apoyî reyde rayraşîyayîşê ciwanan dewam keno zî. Têgêrayîşê ma yê ciwanan vera metodanê şerê taybetî têkoşînêkê xurtî nêkeno. Ganî ciwanî zaf biewnê, xo nê sîstemî ra bixelisnê, têkoşînê sîyasî xurt bikerê û bi aktîfî tewrê têkoşînî bibê. Çunke ameyox ê înan o. 

Çalakîyanê Sêwrege û Hîlwanî ra dima ronîyayîşê PKKyî Kurdîstan û teberê welatî de veng vet. Ewropa de merdiman welatperwerî şinasnayî. Îlanê ronîyayîşê PKKyî ra dima Rayber Apo derbazê Rojawanî bibi. O çax herêma ereban de karkerê kurdî est bîyî coka na herême de zî PKK vila bi. Rojhelatê Kurdîstanî de destpêkê 80an de, Başûrê Kurdîstanî de 1981-82yî de PKK dest pê vilabîyayîşî kerd. Vakur de xora mîyanê şarî de PKK bi lezî vila bi. PKK verê şarî de bi baldarî têgêra. Milîtan û kadroyî bi hûrmetî nêzdîyê şarî bîyî. Xora bi nê hawayî PKKyî tesîrê şarî kerd. 

Îdîaya PKKyî pîle bîye û armancê ci zî qetî bi. Rayber Apo wayîrê kesayetêkê bidîsîplînî bi, cidî bi, perwerê armancanê xo bi. Milîtan û welatperwerê raştikênî zî ganî peyê menfaetanê xo de nêşorê. Apogîrî ganî têna erkanê xo bîyarê ca, seba şar û partîye bixebitê. 

Azadîya cinîyan her çî ra hîna girîng a. Şerê taybetî yê dewleta tirke tewr zaf hêrişê cinîyan kerd. Destpêk de cinîyî bi giranî tewrê PKKyî nêbîyî. Şertê ê çaxî cîya bîyî. La PKKyî seba azadîye venga cinîyan da. PKKyî Êlihî ra heta Dêrsim û Serhedî xebatê cinîyan kerdî. Dima tewrbîyayîşan dest pêkerd. Bi taybetî Hemleya 15ê Tebaxe ra dima zaf cinîyî tewrê PKKyî bîyî. Rayberîye zimistanê 1993-94î de artêşbîyayîşê cinîyan ercna. Dima zî jineolojî awan kerde ke Kurdîstan de şorişêko pîl bi. Azadîya kurdan serkêşîya cinîyan de û bi azadîya cinîyan aver şina. No zî tesîrê pêro dinya keno. Serewedaritişê Rojhelatê Kurdîstanî û Îranî îsbatê ney o. Ewro Şorişê Cinîyan bi sloganê 'jin, jiyan, azadî' vilayê pêro dinya beno. 

Tay kesî vanê ke ê do PKKyî çin bikerê. La biewnê PKK ewro bîyo têgêrayîşêko enternasyonel. Ewro dinya seba azadîya Rayber Apoyî têkoşîn kena. Seba ke PKK nameyê pêro bindestan ser o têkoşîn keno dinya de hende vila beno. Têkoşînê Kurdîstanî vilayê pêro merdimatîye, cinîyan, ciwanan, şaran û bindestan beno. Ê zî xo de PKKyî vînenê. PKK do vila bibo, çew nêeşkeno verê ney bigêro. Têkilîya PKKyî Tirkîya Kurdîstan û dinya de bi pêro têgêrayîşan est o. 

Ma bi na hişmendî kewenê serra 45. ya PKKyî û serra 50. ya Rayberîye. Ma do têkoşînê xo pîlêr bikerê. Ez serra 45. ya PKKyî reyna fîraz kena û têkoşînê azadîye û demokrasî de her kesî rê serkewtiş wazena.''