Endama Komîteya Rayberdişî ya PKKyî Duran Kalkanî bernameyê Ulkeden ê televîzyonê Medya Haberî de derheqê Zînê Wertê de cadayîşê hêzanê PDKyî de qisey kerd û nê vatî:

''Yeno dîyene ke PDKyî hêzê xo sewqê Wertê kerdî û xîret keno ke uca de xo rê baregehêk awan bikero. Vanê ke semedê vîrusê Korona ra sey tedbîr wina kenê la no raşt nîyo. Na herême serê sînorî de nîya, herêmêka Başûrê Kurdîstanî ya. Noqtayêka asayîşî ya Qendîlî ya. PDKyî par zî bi zorê TCyî herêma Bradostî de, Xinere de kerd ke baregehê winasênî awan bikero. La ma vera ney tewirê xo mojna û PDKyî baregeh înşa nêkerd. Nika wazeno Wertê de wina bikero. Reyna heman tehluke dewam keno. Wertê de yeno waştene ke pê paştdayîşê TC û DYA vera Qendîlî têgêrayîşo leşkerî bêro kerdene. No têna bi nê hawayî yeno famkerdene. Bi nê hawayî asayîşê Qendîlî werte ra yeno wedaritene. Xora îdareyê ma zî eşkera kerd, çîyo ke ma par seba Bradostî vat seba Wertê zî derbazdar o. No sebebêkê şerî yo, qet nêno qebulkerdene. DYA û TC wazenê PDK zî ano ca. Mabênê hêrişê vera PKKyî yê pê paştdayîşê DYA û TC û kurdayetî, azadîye eleqe çin o. No têna şerê zereyî yê kurdan ano meydan. PDK pê waştişê înan vera PKKyî hetê dişmenan de şerêk dano destpêkerdene. Sewbîna yew îzahê naye çin o, ganî her kes wina bizano. Eke şerêk dest pêbikero, berpirsîyarê ci ma nîyê.

Ma hêvî kenê ke sey Bradostî naye ra zî fek do bêro veradayene. Xora na herême destê PDKyî de nîya. A herême 20 serrî verê cû destê 2000 gerîlayan de mende. PKK bi serran o ke destûr dano ke komêka qije ya YNKyî uca de bimana. PDK çira ame û çira YNKyî seba ney destûr da nêno famkerdene. Gelo pê zanayîşî wina kenê? YNK zî mîyanê nê karî de yo? Ganî nê çîyî eşkera bibê. PKKyî 20 serrî verê cû tewirêko xedar nêmojna û herême seba şar, pêşmergeyanê YNK û PDKyî akerde. La rixmê ney zî kerdişêko winasên provokasyon o, pê aqlê DYA û TCyî têgêrayîş o. No keno ke şerê zereyî yê kurdan teşwîq bibo. Bi nê hawayî nê hêzî benê parçeyê hêrişê vera PKKyî. PKK do ney qebul nêkero, vera ci şer bikero, pêro bedelan dano. Ganî pêro welatperwerî, roşnvîrî, şarê Başûrê Kurdîstanî bizanê ke no sûcê PKKyî nîyo. Çunke vera PKKyî hêrişêk ame kerdene. Uca herêmêk a ke binê kontrolê PKKyî de ya. Eleqeyê PDKyî pê uca çin o. PDK vera cayêkê winasênî têgêrayîşêkê leşkerî keno. PKK do vera ney xo bipawo û wexto ke xo pawit ganî çew PKK sey berpirsîyar nêvîno. Ma pê bawer û hêvîdar ê ke komel hîsgerîye ano ca û PDK zî hîşmendîya parî emser zî do bimojno. Eke wina bo hol bêno. La eke wina nêbo ma sûcdar nîyê.''