Komîsyonê Qoricîyan yê Walîtîya Wanî seba ke dewij û şiwaneyan bikero qoricî, şarî ra vano “Şima do heta key şiwanetî bikerî? Şiwane mebe, qoricî bibe” û bi no hawa hewl dano înan bikero qoricî.

Dewa Hoşapî ya qezaya Payîzava ya Wanî de demêko derg o ke grûbêk bi wesayîtan gêrena û bitaybetî şiwaneyan kena qoricî. Qeymeqamê Payîzava Osman Dogramaci zî muxtaran reyde hewl dano dewijan îkna bikero. Komîsyonê Qoricîyan yê Walîtîya Wanî zî çîyanê madîyan pêşnîyazê dewijan keno û hewl dano înan bikero qoricî.

Qeymeqam Dogramaciyî hewteyo verên bi wesîleya Aşma Muharremî dewa Hoşapî de mewludêk dayo û ewja de qala qoricîtîye kerdo.

Kesê ke qezaya Artemêtanî de seba qoricîtîye ameyî îkna kerdene, ameyî cerebnayene. Testê vazdayîşî yê 48 kesan ame viraştene. Qeymeqamê Artemêtanî û qayûm Atif Çîçeklî bi xo nê testî îdare kerd.

VÊŞAN VERADE, QORICÎ BIKE Û BIKE AJAN

Parlamenterê HDPyî yê Wanî Murat Sarisaçî dîyar kerd ke AKP şarî ser o polîtîka ‘Vêşan verade, qoricî bike û bike ajan’ domneno û wina va: “AKP weçînayîşê herêmî zî fikirîyeno û hewl dano şarî bikero qoricî. Wazenî her dewe de qoricîyî bibî. Bi no hawa hewl danî vernîya yewîyêka şenike zî bigîrî.”