Endamê Konseya Rayberdişî ya KCKyî Mustafa Karasu tewrê bernameyê taybetî yê Medya Haber TVyî bi û rojdem ercna.

Qiseykerdişê Karasuyî ra beşêk wina yo:

''Rayber Apo vîst û panc serrî yo binê tecrîdî de yo. Di serrî yo zî ma qetî tira xeberêke nêgirewte. Rayber Apo Îmrali de tewirê azadîye û demokratîkî yê şarê kurdî mojneno. Coka dewleta tirke û îqtîdarê AKP-MHPyî vera ey hende tecrîdêkê giranî anê ca. Dewleta tirke seba ke kurdan û têgêrayîşê azadîye tasfîye bikera hêrişê Rayber Apoyî kena. Rayber Apoyî seba ke kurdî rêxistin kerdî û meseleya kurdan arde rojdem dewlete tira pê tecrîdî qesas gêna. La ma vînenê ke rixmê hende teda û tecrîdî zî ewro dinya de firkê Rayber Apoyî vila benê. Şarê kurdî û şarê Rojhelatê Mîyanênî fikranê ey ra hêz gênê. Merdimî pêro dinya de hînî wazenê sîstemê modernîteya kapîtalîzmî ra xo bixelisnê coka verê xo danê fikranê Rayber Apoyî û îdeolojîya ci. Rayber Apoyî vera sîstemê kapîtalîzmî sîstemê konfederalîzmê demokratîkî, azadîya cinîyan, ekolojî û tewirê demokrasî vet werte. Coka sere de cinîyî şarî dormeyê fikranê ey de yenê pêser. Şarî do hîna zaf wayîrê Rayberîye xo vejîyê. Nika her cayê dinya de merdimî seba azadîya Rayber Apoyî vejîyenê meydanan. No têkoşîn do bibo têkoşînê rijnayîşê kapîtalîzmî zî.

Komîteya Vergirewtişê Îşkenceyî (CPT) ya Konseya Ewropa verê tecrîdê Îmraliyî de bêveng a. Çunke cara no tecrîd hetê Ewropa ra yena caardene. Tirkîya têna gardîyanîya ci kena. Yewîya Ewropa û CPT qaşo demokratîk ê la wexto ke babete yena kurdan ser ê heqanê merdiman peygoş kenê. Na şerma înan a. Ewropa Peymana Lozanî de cara destûr dabi ke Tirkîya kurdan qir bikera. Hema zî Ewropa perwera na peyman a.

Dewleta tirke pê çekanê kîmyewîyan, gazanê jehrînan, bombayanê termobarîk û nukleran hêrişê gerîlayan kena. Vera nê şerê kîmyewîyî yê dewleta tirke xoverdayîşêko pîl yeno kerdene. Embazê ma hê koyan de bi fedakarî têkoşîn kenê. Ganî şarê kurdî vera nê hêrişan wurzo payan ser, hêzê demokratîkî yê Tirkîya zî ganî wurzê payan ser. Dewleta tirke kena ke serê nê hêrişan bigêra û merdiman bêveng bikera. Xora meseleya kurdan de demokratî cade benê faşîst.

Dewleta tirke dişmena kurdan a, hêrişê kurdan kena. Ewropa zî her ca de peyê menfaetanê xo de ya, coka peygoşîye kena. La PDK serê nê hêrişan gêno. PDK verê merdiman û heyetanê cigêrayîşî gêno. PDK seke erkê ci yo sûcanê dewleta tirke mîyan keno. Xora dewleta tirke hêrişê kamca bikera PDK ci rê yew bahane vîneno. PDK vano 'dewleta tirke naye ra hêrişê Rojawanî, Şigalî kena.' La qetî dewleta tirke sûcdar nêkeno. Şermêka pîl a ke PDK hêrişanê kîmyewîyan ê dewleta tirke mîyan keno.''