Endamê Konseya Rayberdişî ya KCKyî Mustafa Karasuyî Medya Haber TV de tecrîdê Îmraliyî, hêrişanê îşxal û qirkerdişî ercnayî.

Qiseykerdişê Karasuyî ra qismê girîngî wina yê:

''Hemleya Azadîye 10ê teşrîna verêne de dekewena serrgêra diyîne. Na hemle têkoşînê seba azadîya Rayber Apoyî de hemleyêka girînge bîya. Nê prosesî de avûkatan CPT de pêvînayîş kerd, wayîranê Nobel mektubî nuştî, çalakîyê girîngî ameyî kerdene. Têkoşînî zor da CPT û Mehkemeya Heqanê Merdiman a Ewropa (MHME) û Tirkîya. Xora emser Festîvala Frankfurtî de zî tecrîd do bibo rojdem. 13ê teşrîna verêne de Amed de rayraşîyayîşêko girîng zî est o. Dinya de seba azadîya Rayber Apoyî têkoşînêko girîng yeno kerdene û tecrîd rojdemê dinya de yo. Ganî Tirkîya de zî roşnvîr û hêzê demokrasîyî vera tecrîdî vengê xo bikerê. Ewro nîsbetê demokratbîyayîşî vera tecrîdê Îmraliyî vejîyayîşî yo. 

Dewleta tirke 2021 ra nata bi giranî hêrişê Herêmanê Pawitişî yê Medya kena. Gerîlayî tîya de û Vakur de bi qerardarî xo ver danê. Dewlete hema zî gêrena ke kurdan qetil bikera. Qirkerdişê fîzîkî reyde qirkerdişêko kulturel, ekolojîk û bawerî zî est o. La wa her kes bizano ke têkoşînê ma 50 serr3i yo dewam keno û no têkoşîn nêno asteengkerdene.

Hinî ney ra agêrayîş çin o. Zap de dewleta tirke kilîdkerde mende. PDKyo ke hemkarîya dewleta tirke keno, do nêeşko nê kilîdî abikero. Xora çimê şarê ma yê Başûrî de yew meşrutîyetê PDKyî zî nêmend. Başûr zî do hêdî hêdî bibo warê xoverdayîşî. Peymana mabênê Iraq û Tirkîya peymanêka îxanetî ya. Na peymane do Iraq debikera mîyanê tengasîye. 

Ma zaf kewtê verê qetilkerdişê Narîne Guran. Nê serebûtî ser o gumanê pîlî est ê. Ganî bêro eşkerakerdene ke na domane çira kişîyaya. Cendirmeyan vatbi ke ê do Narîne weş û war bivînê. La nînan komel xapîna. Dewlete nê cînayetî de tayê kesan pawena. Xora vervatoxê dewlete yê Amedî Ensarîogullariyî zî no îtîraf kerd. Ganî polîtîkayê dewlete nêrê cipersayene.

Tayê kesî bi taybetî Kemalîstî vanê 'Kurdî kanwaz ê, feodal ê. Xora naye ra operasyonî yenê kerdene.' Nê kesî hêrişê tradîsyonî û erjanê kurdan kenê. Eke feodalîzm est o, rîyê dewlete ra est o. Yanî wa nê kesî hêverî dewlete rexne bikerê. Kurdîstan de têkoşînê cinîyan est o, cinîya azade est a, keyeyê demokratîkî est ê. ''