Endamê Konseya Rayberdişî ya KCK’yî Mûstafa Karasû bi meymanê programê “Ulkeden” ê televîzyonê Medya Haber TV û persanê xeberdar Kadîr Hurdoganî rê cewabî dayî.

Karasûyî vist vîrî çîyo ke Îmrali de yeno bicaardene sîstemêkê tecrîdî yo û vat, “Wextê tepiştişê Rayber Apoyî ra nata ê ser o tecrîd yeno ferzkerdene. Demêk ameyo şidênayene, demêk semedê halê sîyasîyî ameyo sistkerdene. Çîyo ke ewro yeno kerdene tecrîdo şidênaye yo, têkilîya nê zî bi halê sîyasîyî esta. Sîstemêko hîra yê qirkerdişî şarê Kurdî ser o yeno ferzkerdene. No çî paralelê tecrîdkerdişê Rayber Apoyî de yeno kerdene.”

AKP Seba ke Nefes Bido Îqtîdarê Xo yê Tengbîyayeyî Avûkatî Şirawitî Îmrali

Karasûyî da zanayene xoverdayîşê mayanê mexmelesipîyan û destpêkerdişê rojeyê mergî, nê heminan îqtîdarê AKP’yî fînayo halêkê tengî mîyan û vat, “Netîceyê nê de seba ke zextê rayapêroyî yo ke zere ra virazîyayo bêro şenikkerdene, seba ke razînêbîyayîşê şarê Kurdî bêro kemîkerdene avûkatî şirawitî verê Rayber Apoyî. Înan sere de waştişê pêvînayîşî red kerdibi. La dima ra avûkatan rê gêrayê û vato, ‘Şima eşkenê bêrê û muwekîlê xo bivînê.’ Avûkatî zî na çarçewaye de şinê pêvînayîş kenê. Xora avûkatan netîceyê pêvînayîşî rayapêroyîye dir pare kerdî.”

Avûkatan Şertanê Tecrîdî de Pêvînayîş Kerd

Karasûyî bale ante ke pêvînayîş netîceyê zextê rayapêroyîye de û xoverdayîşê şarî de virazîyayo û vat, “Tecrîd hewna nêqedîyayo, çunke politikaya şerî ya AKP’yî nêvurîyaya. Polîtîkayê qirkerdişî yê hemverê Kurdan nêvurîyayê, hewna zî dewam kenê. Bingeyê na polîtîka de tecrîdkerdişê Rayber Apoyî esto. Naye ra dimayê pêvînayîşî ra tepişteyan bi eşkerayîyêk da zanayene ke tecrîd nêqedîyayo û ê do çalakîya xo bidomnê. Heman wextî de eşkera kerdî ke do grûba dîyine dest bi rojeyê mergî bikero.”

Kurdan Îqtîdarê AKP-MHP’yî Zihîf Kerd, Bin Fîna

Karasûyî bale ante serê spekulasyonanê derheqê pêvînayîşî de û vat, “Derheqê pêvînayîşê Rayber Apoyî de spekulasyonî yenê kerdene. Nê merkezê şerê taybetî de yenê afernayene ke kontrolê AKP’yî de yê. Kurdî Tirkîya de hêzê demokratîkî yê tewr cewherî yê. Perçeyê bingeyênî yê hêzanê demokratîkan ê. Tirêm eşkeno bêro pawitene ke no hêzo tewr demokratîk ê Tirkîya tewirêkê cîyayî ramojno?

Heta ke politikaya hemverê Kurdan, politikaya qirkerdişê Kurdan nêvurîyo, politikaya Kurdan a hemverê îqtîdarê AKP-MHP’yî zî nêvurîyena. Xora bi zîhnîyetê AKP-MHP’yî problemi hal nêbenê. Naye ra ganî îqtîdarê AKP-MHP’yî raste ra bêro wedartene. Naye ra ganî nêro pawitene ke Kurdî do weçînitişê Stenbolî de tewirê xo bivurnê.”

Cuye bi Tecrîdî Nêbena

Endamê Konseya Rayberdişî ya KCK’yî Mûstafa Karasûyî grevê vêşanîye û rojeyê mergî yê hemverê tecrîdî reyna bi hurmet silam kerdî û vat, “Ez hemrayanê ke tewrê rojeyê mergî bîyê bi hurmet silam kena. Înan manaya tarîxîye ya tecrîdî fam kerda. Dîyo ke mucadeleyê hemverê tecrîdî heman wextî de mucadeleyê hemverê faşîzmî yo. Senî xoverdayoxanê 14’ê Temmuze ê wextî mesuldarîya xo dîye, bi çalakîya xo hemverê faşîzmî de tewirê xo ramot û herekîyayîşê tarîxî vurna, înan zî bin o qayde dest bi çalakîye kerde û bi nê hawayî çalakîya xo domnenê.

Ma na yewe vanê; Ma nêwazenê bi tecrîdî biciwîyê, şarê ma nêwazeno bi tecrîdî biciwîyo. Hemrayê ma yê ke zîndanan de yê nêwazenê bi tecrîdî biciwîyê. Ma hendî nêwazenê bi tecrîdî biciwîyê. Naye ra heta qedîyayîşê tecrîdî do mucadele dewam bikero.”

Mayê Mexmelesipîyî Wijdanê Şarê Kurdî yê

Karasûyî bale ante serê çalakîyanê mayan ê Kurdan û vat, “Mayê Kurdî yê bi mexmela sipîyî wijdanê şarê Kurdî yê. Îradeyê şarê Kurdî yê. Ma destê înan heminan bi hurmet maç kenê. ê mesuldarîya xo ya hemverê tarîxî de bica anê. Mayî zanê ke Rayber Apoyî çi bi cinîyan ê Kurdan dayo qezenckerdene. Ê zî sey domananê xo zanê ke tecrîd seba şarê Kurdî yeno çi mana. Naye ra ê refanê tewr vernîyan de ca gênê, xover danê. Ganî ciwanî zî her ca de hemverê hêrişanê ke serê mayan de yenê kerdene çalakîyan virazê.”