Karasû: Mesele Îmamoglû û CHP nêyo. Mesele binfînayîşê AKP-MHP’yî yo ke dişmenîya Kurdan keno û polîtîkaya qirkerdişî ya hemverê Kurdan rayra beno. Sere de Kurdî, hêzê demokrasîyî ganî şirê sindoqan û rayanê xo bidê.
Endamê Konseya Rayberdişî ya KCK’yî Mûstafa Karasûyî muhîmîya Stenbolî, manaya ê ya seba Kurdan û weçînitişo cayî yê Stenbolî ANF’yî rê ercnayî.
Karasûyî destpêk de bale ante serê xorînîya tarîxî ya Stenbolî û vat Stenbol bajarêko alelade nêyo. Karasûyî vat, “Beno ke nifûsa ci 15 mîlyonî bo, labelê wayîrê hêz û tesîrêkê 30 mîlyonî merdimî yo. Gama partîyêk bajarêkê winayênî de bibo îqtîdare do bibo wayîrê serdestî û avantajî.”
Stenbol Bajaro Tewr Pîl ê Kurdan o
Karasûyî qiseykerdişê xo wina domna: „Vanê ke Stenbol bajaro tewr pîl ê Kurdan o. Tîya de qest tena Kurdê Sunî nêyê, ganî merdim Kurdanê Elewîyan zî bikero mîyanê hesabî. Yeno vatene ke înan ra zafane Sêwas ra yê. Sêwasijanê ke koçê Stenbolî kerdo se ra 80’ê înan Kurdê Elewî, se ra 15’ê înan Elewîyê Tirk ê û se ra 5 zî Kurdê Sunî yê. Rastîyêka winayêne esta.
Stenbol qismêko muhîm ê mucadeleyê azadîya Kurdan o. Wareyêkê mucadeleyî yê Kurdan zî hendî Stenbol o, metropol ê. Seba demokratîkbîyayîşê Tirkîya Stenbol zaf muhîm o. Ganî têkilîya Kurdan a bi Stenbolî bi nê hawayî bêro ercnayene.”
Potansîyelê HDP’yî Stenbol de Xeylî Xurt o
Karasûyî vat, „Potansîyelê HDP’yî Stenbol de xeylî xurt o. Nisbetê rayanê xo yê nikayênan eşkeno bikero hîrê hendeyî. Seke Rayberê ma zî vano ‘HDP eşkeno pêroyîya Tirkîya de se ra 30’ê rayan bigêro’. Labelê gama mesela bena Stenbol ganî bieşko se ra 60 zî bigêro. Zafaneyê merdimê ke raya xo danê CHP’yî eşkenê bidê HDP’yî zî. Hewna zî qismêko muhîm ê Elewîyan raya xo danê CHP’yî. Cayê înan teqez zereyê HDP’yî yo.
Nê weçînitişî de zî Kurd û hêzê demorkasîyî do paştî bidê stratejîya HDP’yî û raya xo seba binfînayîşê AKP’yî bişuxulnê. Kurdî cimatêko winayên nêyê ke raya xo bidê înanê ke wazenê estbîyayîşê înan raste ra wedarê. Naye ra hêzê demokrasîyî zî û Kurdî zî do dersêka pîle bidê AKP’yî.”
Weçînitişê Stenbolî Agêrayê Referandûmêkê Demokrasîyî
Karasûyî peynîya qiseykerdişê xo de nê vatî: „Xusûsen hemverê polîtîkayanê AKP-MHP’yî de, hemverê nênaskerdişê îradeyê weçînitişî de vejîya werte ke ganî hendî cewabêk bêro dayene. Yan do no fehmo faşîst bêro zihîfkerdene û binfînayene yan zî do no fehmo faşîst bi temamî bibo serdest. Êyê ke 31’ê Adare de şîyî rayê xo dayî ganî reyna rayanê xo bidê û nê weçînitişî de nêweş bibê zî yan zî mazeretê înan çi beno wa bibo seba demokratîkbîyayîşê Tirkîya û azadîya şarê Kurdî ganî şirê rayanê xo bidê.“
