Endamê Komîteya Rayberdişî ya PKKyî Mustafa Karasuyî Bernameyê Taybetî yê Medya Haber TVyî de rojdem ercna.

Qiseykerdişê Karasuyî ra tay noqtayê girîngî wina yê:

''21 mengî yo Rayber Apoyî ra xeberêke nêna girewtene, 24 serrî yo tecrîdê Îmraliyî dewam keno. No tecrîdê 24 serrî têkoşînê xurtî yê Rayber Apoyî zî dîyar keno. Nêzdîbîyayîşê dewleta tirke yê vera kurdan qirkerdiş o. Coka dewleta tirke vera Rayber Apoyî tecrîdî ana ca. No tecrîdo giran polîtîkayêka qirkerdişî ya, nêzdîbîyayîşê qirkerdişî yo.  Bêvengîya Amerîka û Neteweyanê Yewbîyayeyan a vera tecrîdî tesdîqkerdiş o. Nê dewletî xora Peymana Lozanî ra nata vera qirkerdişê kurdan zî bêveng manenê. Polîtîkaya qirkerdişî û zulmê vera kurdan normal nîyê. Ê wazenê kurdan bi temamî çin bikerê. Ganî her kes nînan bivîno û nê polîtîkayanê qirkerdişî qebul nêkero.

Wayîrvejîyayîşê Rayber Apoyî yeno manaya qebulnêkerdişê qirkerdişê kurdan o. Êyê ke wayîrê Rayber Apoyî nêvejîyenê kurdayetîye ra zî fek vera danê. Rayber Apoyî şarê kurdî zanaye kerd, rêxistin kerd û kerd wayîrîrade. Nika vera Rayber Apoyî hêriş yeno kerdene. Ma pêro deyndarê Rayber Apoyî yê. Coka wa her kes wayîrê ci vejîyo. Bêguman şar wayîrê ci zî vejîyeno. Ewropa de tim seba ney çalakîyî yenê kerdene la ganî no wayîrvejîyayîş bêro hîrakerdene.

Şaranê Rojawanî vera DAÎŞî şer kerd, seba merdimatîye şer kerd. Rixmê ney zî dewleta tirke ha Kobanê îşxal kena. Hêzê mîyanneteweyî zî seba menfaetanê xo verê nê hêrişan de bêveng manenê. Dewleta tirke senî ke Vakurê Kurdîstanî de polîtîkaya qirkerdişî ana ca Rojawan de zî wina polîtîkaya qirkerdişî ana ca. Dewleta tirke wazena Rojawan de nufusê kurdan çin bikera. Amerîka, Rûsya û Ewropa zî ney tesdîq kenê.

Ganî şarê ma vera nê kerdişanê dewleta tirke tewirê xo bimojno. Dewleta tirke Efrîn, Girê Sipî û Serêkanîyê cara îşxal kerdî nika zî wazena herêmanê bînan îşxal bikera. Êyê ke vera ney xo ver nêdanê wa kurdayetîye ra fek vera bidê. Ganî şarê ma verê nê îşxalî vindero. Eke şarê ma bi xurtî xo ver bido û nêrazîbîyayîşê xo bimojno o çax şarê dinya zî do paştî bidê şarê kurdî.

Seserra 21. do biba seserra cinîyan. Serewedaritişê Îran û Rojhelatê Kurdîstanî zî ney mojneno. Şarê Îran û Rojhelatê Kurdîstanî azadîye wazenê. Nika ra Îran de zaf çîyî vurîyayê. Rewşa Îranî do tesîrê pêro Rojhelatê Mîyanênî bikera.''